Almaty ákimdigine qala mańyndaǵy eldi mekenderdiń máselesin sheshýge syrttan qaryz alýǵa ruqsat beriledi, dep habarlaıdy Almaty-akshamy.kz
Bul týraly Ulttyq ekonomıka mınıstri Álibek Qýantyrov Májilis kýlýarynda aıtty. Onyń sózinshe, búgin Májilis birinshi oqylymda qabyldaǵan "Aglomerasıalardy damytý týraly" zań jobasy Almaty qalasy ákimdigine syrttan qaryz alýdyń taǵy bir tetigin beredi.
«Mundaı múmkindik tek Almaty qalasyna ǵana beriletinin aıta ketý kerek. Bul qarajat Almaty mańyndaǵy aglomerasıanyń aýmaǵynda ınfraqurylymdy damytý jobalaryna jumsalýy kerek. Al onyń lımıti búdjetti retteıtin normalarǵa saı belgilenedi. Almaty qalasynyń búdjettik múmkindikteri belgilengen. Demek, atalǵan maqsatqa alynatyn syrtqy qaryzdyń lımıti sol belgilengen búdjet múmkindikterinen aspaýy kerek. Lımıt osy negizde retteledi», - dedi mınıstr.
Sondaı-aq ol atalǵan maqsattaǵy qaryzdy Almaty ákimdigi tek teńgemen ǵana ala alatynyn atap ótti. Aıtýynsha, ákimdikke teńgemen qaryz berýge nıetti halyqaralyq uıymdar bar.
«Dúnıejúzilik bank toby bar ǵoı. Onyń IFC (International Finance Corporation) deıtin qurylymy bar. Osy IFC ujymy Almaty qalasynyń ákimdigine tıisti qarajat berýge daıyn. Biraq ol ulttyq valútamen beriledi», - dedi Ulttyq ekonomıka mınıstri.