E.Dosaev joldardy salý jáne jóndeý kezinde jańa materıaldardy qoldanýdy qarastyrýǵa tapsyrma berdi.
Almatyda qala ákimi Erbolat Dosaevtyń tóraǵalyǵymen jaýapty basqarma basshylarynyń, aýdan ákimderiniń, kólik kompanıalary men ǵylymı mekemeler ókilderiniń qatysýymen 2022 jylǵa arnalǵan Almaty qalasynyń kólik ınfraqurylymyn damytý máseleleri jóninde keńes ótti, dep habarlaıdy Almaty-akshamy.kz.
Keńes barysynda aǵymdaǵy jylǵa arnalǵan jol ınfraqurylymyn damytý boıynsha jumys josparyn oryndaý jónindegi esep tyńdaldy. Josparǵa jolaıryqtaryn salý, kóshelerdi uzartý, shaǵynaýdandarda jol salý, ortasha jáne aǵymdaǵy jóndeý jumystaryn júrgizý jáne t.b. kiredi.
Búginde Almatynyń kóshe-jol jelisiniń uzyndyǵy 3 097 shaqyrymdy quraıdy, onyń 234 shaqyrymynda qatqyl jabyn joq. Jaqsy jáne qanaǵattanarlyq jaǵdaıdaǵy joldar úlesiniń kórsetkishin 2025 jylǵa qaraı 95%-ǵa deıin jaqsartý qajet. Jyl saıyn 70 km jańa jol salý, uzyndyǵy keminde 200 km joldy ortasha jáne 350 myń sharshy metrden astam asfáltbeton jabynyn aǵymdaǵy jóndeýmen qamtý qajet.
Qazirgi ýaqytta qalada úsh jolaıryǵynyń qurylysy jalǵasýda. Jyl sońyna deıin Buqtyrma kóshesi, Qulja traktisi, Saın - Móńke bı jáne Seıfýllın - Jansúgirov kósheleri boıyndaǵy jolaıryǵynyń qurylysyn aıaqtaý josparlanýda.
Keńes barysynda úsh kósheni uzartý boıynsha aǵymdaǵy jumys barysy talqylandy. Saın kóshesin uzartýi kelesi jyly, Tóle bı kóshesin uzartý jer ýchaskelerin satyp alý jáne qaıtaryp alý merzimderine baılanysty 2024 jyly aıaqtaý josparlanyp otyr. Kezdesý kezinde jalpy uzyndyǵy 9,3 km bolatyn Rysqulov dańǵyly, Jubanov, Qajymuqan kósheleri men Abaı dańǵylyn jalǵaıtyn tórt jobanyń jobalyq-smetalyq qujattamasyn ázirleý barysy týraly baıandaldy.
Qala ákimine "Alǵabas", "Álmerek", "Qaırat" jáne "Aqjar" sıaqty tórt shaǵynaýdanda jol salý jumystarynyń barysy týraly baıandaldy. Úsh shaǵynaýdanda ("Shańyraq-1", "Shuǵyla" jáne "Shapaǵat") atqarylatyn jumystar kezekte tur. Bıyl barlyǵy 70 shaqyrym jańa joldyń qurylysy júrgizilýde. Jol jumystary energetıka jáne sýmen jabdyqtaý basqarmasymen kelise otyryp, ınjenerlik jeliler qurylysynyń aıaqtalýyna qaraı oryndalatyn bolady.
Ortasha jóndeý jumystary aıasynda uzyndyǵy 219 shaqyrym 221 kóshede, onyń ishinde qalanyń 18 magıstraldy kóshesinde jumystar júrgizilýde. Búginde 87 kóshede ortasha jóndeý jumystary aıaqtaldy. Joldardyń sapasyna keri áser etetin negizgi problemalyq máseleler apatty qazý faktileri, komýnaldyq qyzmetter men jeke qurylys salýshylardyń jelilerdi tartý boıynsha josparly jumystar boldy. Qala ákimi jumys tıimdiligi men sapasyn arttyrý úshin qala aýdandary basqarmalary men ákimdikteriniń is-qımylyn úılestirýdi tapsyrdy.
Kezdesý barysynda jol qozǵalysyn retteýdiń tehnıkalyq quraldarynyń qyzmet kórsetýi jáne jóndeý, jol belgilerin salý jáne jańartý jumystarynyń barysy týraly baıandaldy. Jyl basynan beri 1712 jańa jol belgileri ornatylyp, 52 baǵdarsham nysany iske qosyldy, 184 myń sharshy metr jol belgileri jasaldy, 1200 metr jol qorshaýy ornatyldy. Almaty ákimi E. Dosaev qalalyq mobıldilik basqarmasyna jóndelgen ýchaskelerdegi tańbalardyń sapasyna nazar aýdarýdy tapsyrdy.
Qala basshysyna jańa tehnologıalar men materıaldardy qoldaný, sonyń ishinde lúkterdiń jańa túrlerin, mastıkalyq lentany, polımerli negizdegi asfáltbeton qospasyn jáne t.b. paıdalaný jónindegi eksperımenttik jumystardyń aldyn ala jasalǵan qorytyndylary usynyldy. E.Dosaev joldardy salý jáne jóndeý kezinde jańa materıaldardy qoldanýdy qarastyrýǵa tapsyrma berdi.
Metronyń eki stansıasynyń paıdalanýǵa berilýine baılanysty baǵyt jelisin ózgertý josparlanýda, onyń ishinde jyl sońyna deıin jaqyn arada jańa tórt baǵyttyń ashylýy jáne aǵymdaǵy 9 baǵytty túzetý kútilýde. Qala basshysy qoǵamdyq kólik júrgizýshileri úshin avtobýstarǵa arnalǵan burylý-ótý alańdaryn jaqsartýǵa erekshe nazar aýdarýdy tapsyrdy.
Keńes barysynda kólik ári jolaýshylardy otyrǵyzý toraptaryn, avtobýs parkterin, avtomobıldik gaz toltyrý kompresorlyq stansıalaryn (AGTKS) jáne t. b. salý máseleleri talqylandy.
Keńes qorytyndysy boıynsha qala ákimi jolaıryqtary men ótpeli joldardy salý úshin jer ýchaskelerin satyp alýdy jedeldetýdi, jol belgileri men baǵdarshamdardyń nashar kórinýine baılanysty aǵashtardy sanıtarlyq kesý jumystaryn kúsheıtýdi, sondaı-aq aǵymdaǵy jylǵa josparlanǵan barlyq jumystardy kestege sáıkes oryndaýdy tapsyrdy.