Qala ákimi Erbolat Dosaev Wildberries halyqaralyq marketpleısiniń negizin qalaýshy Tatána Bakalchýkpen kezdesti, dep habarlaıdy Almaty-akshamy.kz.
Kezdesý barysynda taraptar Almaty ındýstrıalyq aımaǵynyń aýmaǵynda logıstıkalyq ortalyq salý múmkindigin talqylady. Wildberries logıstıkalyq ortalyqtyń qurylysyna shamamen 100 mıllıon AQSH dollaryn ınvestısıalaýdy josparlanyp otyr. Investısıalyq joba aıasynda megapolıs kásipkerlerine ınternet arqyly satý naryǵynda olardyń bıznesin keńeıtýge járdemdesý kútiledi.
«Men Almatyda jáne Astanada Wildberries damýyn baıqadym. Aıaq alysy óte jaqsy, kompanıa jyldam qarqynmen damyp keledi. Sapaly qyzmet kórsetip, laıyqty oryn aldyńyzdar. Sizdiń kompanıańyzdyń Reseıdegi úlesi joǵary ekeni túsinikti, biraq Qazaqstan bıznes úshin senimdi seriktes bola alady. Biz turaqtymyz, ashyqpyz. Biz úshin mańyzdy mindettiń biri – jergilikti ınvestor úshin de, sheteldik ınvestor úshin de bıznesti júrgizý úshin qolaıly jaǵdaı jasaý», - dep atap ótti ákim Erbolat Dosaev.
Tatána Bakalchýk Almatyda logıstıkalyq ortalyqtyń qurylysy qazaqstandyq óndirýshiler úshin Wildberries-pen aınalysatyn barlyq óńirdegi naryqqa avtomatty túrde jol ashady dep senedi.
«Biz Qazaqstanmen seriktestikke múddelimiz, qyzmetimizdi keńeıtýge daıynbyz. Bizdiń alańda túrli ónimder, sonyń ishinde qazaqstandyq kásipkerlerdiń ónimderi usynylǵan jáne jaqyn arada sizdiń elimizdiń ónimi kóbeıedi dep úmittenemiz», - dedi Tatána Bakalchýk.
Kelissóz qorytyndysy boıynsha taraptar ózara túsinistik pen yntymaqtastyq týraly memorandýmǵa qol qoıdy.