İİM M.Esbolatov atyndaǵy Almaty akademıasynda qyzmetke jańa taǵaıyndalǵan jas qyzmetkerler Qazaqstan Respýblıkasynyń Konstıtýsıasy men zańnamalaryn qatań saqtaýǵa, óz laýazymdyq qyzmetterin adal atqarýǵa saltanatty túrde ant berdi, dep habarlaıdy Almaty-akshamy.kz.
Jas qyzmetkerler aldynda sóz sóılegen Almaty akademıasynyń bastyǵy A.Saıtbekov jas qyzmetkerlerdi ómirlerindegi erekshe este qalar oqıǵa – ant qabyldaýlarymen quttyqtap, Qazaqstan polısıasynyń mártebesin arttyrýǵa ózderiniń úlgili qyzmetterimen aıanbaı úles qosatyndaryna senim bildirdi.
«Sizder Otan aldyndaǵy jaýapkershilikterińizdi túsinip, elge adal qyzmet etý úshin búgin ant qabyldadyńyzdar. Endigi paryzdaryńyz – Jańa Qazaqstannyń jarqyn bolashaǵy men ultymyzdyń mártebesi úshin aıanbaı ter tógip, eńbek etý. Antqa adal bolyp, ishki ister organdary úshin bilikti kadrlar daıarlaıtyn Almaty akademıasynyń bedelin arttyrýǵa at salysady dep senemin», – dedi A.Saıtbekov.
Ant qabyldaý saltanatynan keıin Almaty akademıasy jeke quramynyń jazǵy kıim úlgisine kóshýine baılanysty saptyq baıqaý ótkizildi.