Vagondar Almaty – Mańǵystaý jáne Almaty – Óskemen baǵyttary boıynsha júretin bolady
Almaty stansıasynan №77/78 "Almaty-2-Mańǵystaý" jolaýshylar poıyzy quramynda Petropavl qalasyndaǵy "ZIKSTO" AQ vagon jasaý zaýytynda shyǵarylǵan jańa vagondar jóneltildi, dep habarlaıdy Almaty-akshamy.kz "Qazaqstan Temirjoly" AQ baspasóz qyzmetine silteme jasap.
Vagon parkin jańartý baǵdarlamasy aıasynda "Jolaýshylar tasymaly" AQ 400 oryndyq 11 kýpe vagon satyp aldy. Vagondar Almaty – Mańǵystaý jáne Almaty – Óskemen baǵyttary boıynsha júretin bolady.
"Vagondar jaıly, tehnıkalyq artyqshylyqtarymen erekshelenedi. Olar aýa baptaý júıelerimen, aýany zararsyzdandyrýǵa jáne tazartýǵa arnalǵan zamanaýı súzgilermen, ekologıalyq taza dárethana keshenderimen jabdyqtalǵan. Vagondarda zamanaýı beınebaqylaý júıesi bar: beınekameralar dálizder men tambýrlarda ornatylǵan jáne túrli-tústi rejımde jumys isteıdi. Tútin dachıkteri bar órt sóndirý júıesimen, jeke órt shlangisimen jáne ár vagonda sý qorymen jabdyqtalǵan", - delingen kompanıa habarlamasynda.
Vagondardyń qyzmet etý merzimi – 40 jyl.
"Jolaýshylardyń jaılylyǵy úshin ár kýpede elektr rozetkalary jáne jolda uıaly telefondardy qaıta zarádtaýǵa arnalǵan USB qosqyshtary ornatylǵan. Vagondarda tońazytqysh, mıkrotolqyndy pesh, aýyz sý dıspenseri jáne ystyq sý tıtany bar", dep qosty kompanıa ókilderi.
Sondaı-aq, jyl sońyna deıin Qyzylorda – Semeı baǵytynda júretin otandyq óndirýshiniń kýpe jáne plaskart úlgisindegi taǵy 50 jańa vagonyń jetkizý josparlanýda.