Jeńimpazdar Italıada ótetin álem chempıonatyna barady
Elde shahmatqa degen qyzyǵýshylyq jyldan-jylǵa artyp keledi, dep habarlaıdy Almaty-akshamy.kz «Habar 24» telearnasyna silteme jasap.
Oǵan Almatyda ótip jatqan el birinshiligi dálel. Balalar men jasóspirimder arasyndaǵy ulttyq birinshilikke Qazaqstannyń túkpir-túkpirinen myńnan astam úmitker kelipti. "Bul - buryn-sońdy bolmaǵan rekordtyq kórsetkish", - deıdi uıymdastyrýshylar. Ázirge klasıkalyq shahmattan júldeli oryndar sarapqa salynýda. Odan keıin jas shahmatshylar rapıd pen blıste baq synaıdy.
Bıylǵy jarystyń utys qory da qomaqty. Ol 13 mln 500 myń teńgege teń. Qazir 8 týrdan keıin 8 jastaǵy órender arasynda Ámirjan Ánetov pen Rızat Ulan top bastap keledi. Al qyzdar arasynda 6 jastaǵy Aısha Bısalıeva alda tur.
Jarys jeńimpazdary 30 naýryz kúni belgili bolady. El chempıony atanǵandar Italıada ótetin álem chempıonatyna barady. Al ekinshi oryn alǵandar Azıa birinshiligine qatysady.
«Shahmat qazir Qazaqstanda óte jaqsy damyp kele jatyr. Qoldaý kórsetilip jatyr. Sondyqtan kóptegen bala qazir shahmatqa kóńilderin kóbirek bólip, úırengisi keletin balalar da kóptep kelip jatyr. Chempıonatqa da, shahmatqa da kelip jatyr. Sondyqtan osy chempıonattan keıin kóptegen talanttarymyzdyń búkil álemge attary shyǵady dep senemin», - dedi jarys dırektory Alma Ashırova.