Halyqtan túsken eskertýlerdi nazarǵa alyp, qordyń İT mamandary saıtty jańartyp jatyr
Autonesie.kz portalyna tirkelgen 761 adamnyń 500-den astamy kólik alyp úlgergen. Ónerkásipti damytý qory qazir saıtty jetildirip jatyr, dep habarlaıdy Almaty-akshamy.kz Almaty.tv-ge silteme jasap.
Jeńildetilgen avtonesıeni jurt qatty kútip-aq júr. Alaıda portal arqyly alý múmkin ekenine kúmánmen qaraıdy. Sebebi 18 sekýndta 761 adam tirkelse, endigisinde álgi sekýndtar birneshe esege qysqarýy múmkin ǵoı. Al qas qaǵym sátte elektrondy sıfrly qoltańbany ashý anaý-mynaý adamnyń qolynan kelmeıdi. Keıbiri portalǵa tirkelýden kúderin úzip, paıyzy joǵary nesıemen mashına satyp alypty.
«Men mashına alamyn dep kórdim. Biraq tizimge ilikken joqpyn. Odan keıin aqshama satyp aldym», – dedi turǵyn.
«18 sekýndta 760 adam alǵanyna senem. Qazir ınternetke baılanysty ǵoı. Bul da 1 mınýttan artyq bolmaıdy-aý dep oılaımyn», – dedi turǵyn.
«18 sekýndta jabylyp qaldy degen múmkin emes, siz oǵan ózińiz senesiz be? Óziń baryp, alǵashqy jarnany tólep, alǵan durys sıaqty ǵoı», – dedi turǵyn.
Osy jeńildetilgen avtonesıe baǵdarlamasyna portal daıyndap, 761 adamnyń tirkelýine múmkindik bergen Ónerkásipti damytý qory qazir saıtty jetildirip jatyr. Iaǵnı, halyqtan túsken eskertýlerdi nazarǵa alyp, qordyń İT mamandary ony jańartyp jatyr. Láılá Toqmuhanbetovanyń aıtýynsha, 6 aqpan kúni saıtqa alǵashqy azamat 10:00:01 sekýndta tirkelgen. Fızıkalyq turǵyda bul múmkin emes bolyp kórinedi, alaıda, qor ókilderi olaı oılamaıdy.
«6 aqpan kúni platforma iske asyrylǵan kezde bir ýaqytta 125 myń adam tirkelýge nıet bildiredi. Sondyqtan saǵat 10:00-da jáne 1 sekýndta tirkelip bolady», – dedi «Ónerkásipti damytý qory» AQ qoǵammen baılanys qyzmetiniń basshysy Láılá Toqmuhanbetova.
Atalǵan baǵdarlamaǵa ótinim berý úshin portal aı saıyn ashylyp, oǵan kem degende 100 adam qatysady dep boljanǵan bolatyn. Alaıda, endigi pýlǵa ótinim qabyldaý qashan bastalatyny belgisiz. Ónerkásipti damytý qory portaldyń ashylatyn ýaqytyn aldyn-ala habarlaıtyn bolady.
Aıta keteıin, ár ótinish 60 kún jaramdy. Eger osy ýaqytta paıdalanylmasa, kelesi aıdaǵy pýlǵa avtomatty túrde ótedi. Eske salaıyn, jeńildetilgen avtonesıe arqyly alatyn kóliktiń quny 15 mıllıon teńgeden aspaýy kerek. Nesıe somasy 10 mıllıon teńge. Bastapqy jarna tólemeısiz. Qarjylandyrý merzimi - 10 jyl. Syıaqy mólsherlemesi - 4 paıyz. Osyndaı tıimdi sharttarmen mashına alǵyńyz kelse, aldymen autonesie.kz saıtyna tirkelý qajet.