Komýnaldyq ınfraqurylym qalaı jańǵyrtylyp jatqanyn Almaty qalasynyń ÓKQ brıfıńinde Almaly aýdanynyń ákimi Aıdar Jaqybaev aıtyp berdi, dep habarlaıdy almaty-akshamy.kz
Óz sózinde aýdan ákimi tozyǵy jetken elektr jelileri problemalaryn atady. Onyń aıtýynsha jelilerdiń 81%-y eskirgen.
«Aýdandaǵy elektr jelileriniń uzyndyǵy 1000 shaqyrymnan asady. Jyl basynan beri elektr jelilerinde barlyǵy 320 apat tirkeldi, bul kabelderdiń tozǵanyn bildiredi. «AJK» AQ kúshterimen tozýdy azaıtý jáne úzdiksiz elektrmen jabdyqtaýdy qamtamasyz etý maqsatynda aǵymdaǵy jyly 50 shaqyrym rekonstrýksıalaý jumystary júrgizildi»- dedi A. Jaqybaev.
Sý qubyry jelileriniń 72,5%-y tozǵan, onyń saldarynan 130 apat tirkeldi. Sýmen jabdyqtaýdy úzdiksiz qamtamasyz etý maqsatynda aǵymdaǵy jyly 4 ýchaskede 1,9 shaqyrym.jelini qaıta jańartý boıynsha jumystar júrgizildi. Jalpy, aýdan halqy 100%-y sýmen qamtý júıesimen qamtamasyz etilgen.
Almaly aýdanynda barlyq 1395 kóppáterli turǵyn úı jylýmen jabdyqtalǵan. Jylý jelileriniń 63% - y eskirgen.
«Bıyl Bógenbaı batyr kóshesiniń boıymen Baıtursynov kóshesinen Naýryzbaı batyrǵa deıingi 400 m jylý jelilerin qaıta jańartý jumystary júrgizildi. Oǵan qosymsha 16 mekenjaı boıynsha josparly jumystar aıaqtaldy», - dep tolyqtyrdy aýdan basshysy.
Aýdan turǵyndary 95% sý burý júıesimen qamtamasyz etilgen. Aýdanda «Almaty Sý» MKK balansynda ornalasqan 249 shaqyrym káriz jelileri bar.
Aýdannyń sý burý jelileri boıynsha tozý 79,2% - 198,2 shaqyrym. bıyl jeke sektordyń 6 kóshesiniń turǵyndary: Qastek-2, Mońǵol, Esentaı, Brýno, Rahmanınov, Qojamqulov jalpy uzyndyǵy shamamen 3 shaqyrym ortalyq kárizben qamtamasyz etildi.
«2024 jyly halyqtyń 99% - y sý burý júıesimen qamtamasyz etiletin bolady, onyń ishinde uzyndyǵy 14 km aýdannyń 25 kóshesinde sý burý qurylysy boıynsha jumystar júrgiziletin bolady», - dep atap ótti A.Jaqybaev.