Bıyl 1 synypqa baratyndar QR-kod pen aýdıodıskisi bar «Álippemen» saýat ashady, dep habarlaıdy Almaty-akshamy.kz 31-arnanyń Informbúro aqparattyq baǵdarlamasyna silteme jasap.
Ata-analar álippeniń qaıta engizilgenine qýanǵanyn aıtyp jatyr. Álippede QR-kod pen aýdıodısk bar. Bastamashylar bala ótken sabaqty tereńirek túsinýi úshin osyndaı zamanaýı ádis qoldanýdy jón kórgen. Iaǵnı, kez kelgen ýaqytta kitaptyń buryshyndaǵy kodty skanerlep, taqyrypty qaıta tyńdaýǵa bolady.
Jańartylǵan álippeniń syrty da, ishi de vızýaldy túrde asa ózgermegen. Biraq birneshe ereksheligi bar. Oqýlyqta ońaıdan kúrdelige qaǵıdaty saqtalyp, oqýshyǵa úırený ońaı bolýy úshin birneshe tyń ádis engizilgen.
«Oqýshyǵa bilimdi tájirıbe arqyly ári óz betinshe alýǵa múmkindik jasaý. Mine osy qaǵıdattar negizinde álippe oqýlyǵy ázirlendi», – dedi QR ǵylymı-praktıkalyq bilim mazmunyn saraptaý ortalyǵy dırektorynyń orynbasary Mánshúk Muhametqalıqyzy.
Ádisker maman Sandýǵash Áteıbek bul oqýlyqty «sıfrly álippe» deıdi. Óıtkeni, kitapta QR-kod pen aýdıodısk bar. Dısk arqyly kitapty elektrondy túrde oqý da oılastyrylǵan. Sonymen qatar, ár taqyrypty ótken soń, kodty skanerlep, maqal-mátelderdi ońaı jattaýǵa bolady.
«Oqýlyqtyń mazmuny túsinikti. Jeńil jáne endi ata-analarǵa da túsinikti bolady dep oılaımyn», – dedi ádisker Sandýǵash Áteıbek.
Kóp ata-ana álippeniń qaıta engizilgenine qýanatynyn aıtady. Tamyry tereńde jatqan álippe balalardyń áripti tez úırenýine oń áser etetinine senimdi. Álippeni qaıta oqý baǵdarlamasyna engizer kezde bes baspadan bes túrli kitap usynylǵan eken. Solardyń arasynan osy oqýlyq úzdik dep tanylǵan. 500-ge tarta mamannyń saraptamasynan ótken álippeniń sátti ne sátsiz shyqqanyn endi ýaqyt kórsetedi.