Sport kúni - Qazaqstan Respýblıkasynyń Tuńǵysh Prezıdenti Nursultan Nazarbaevtyń 2003 jyldyń 15 qarashasyndaǵy Jarlyǵyna sáıkes tamyz aıynyń úshinshi jeksenbisinde atap ótiledi.
Qazaqstandyqtar Sport kúnin atap ótýde, dep habarlaıdy Almaty-akshamy.kz QazAqparat-qa silteme jasap.
Sport salasy Qazaqstanda keń qoldaýǵa ıe. Elde sporttyń damýyna buqaralyq sport qozǵalysyn keńeıtýge, sporttaǵy jetistikterdi yntalandyrýǵa baǵyttalǵan saıasat yqpal etýde. Qazaqstandyq sportshylar sońǵy onjyldyqtarda halyqaralyq jarystarda, Olımpıada oıyndarynda úzdik nátıjelerdi kórsetip keledi. Memlekettiń ózi bedeldi halyqaralyq jarystardy ótkizetin orynǵa aınalýda. Jaqynda QR Memlekettik hatshysy Qyrymbek Kósherbaev elimizdiń sport salasyna kezek kúttirmes reformanyń qajettigin alǵa tartty. Byltyr elimizde Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Mınıstrimen bekitildi. Keshendi jospar 34 tarmaq pen 5 negizgi baǵyttan turady: normatıvtik-quqyqtyq qamtamasyz etý, mektep jáne stýdenttik sport, sport jelilerin keńeıtý, salaýatty ómir saltyn nasıhattaý jáne keńinen taratý, sporttyq-buqaralyq is-sharalary. Jaqynda Premer-Mınıstrdiń orynbasary E. Toǵjanov elimizde buqaralyq jáne balalar sportyn damytýdyń qazirgi problemalary men perspektıvalary jóninde arnaıy keńes ótkizdi. Bıyl halyqtyń sportpen shuǵyldanýyn keminde 35% nátıjege jetkize otyryp (búgingi kúni – 31,6%), nysanaly kórsetkishterdi qaıta qaraý tapsyryldy. Ol úshin ákimdikterge memlekettik sporttyq tapsyrys kólemin ulǵaıtý, qosymsha balalar, jasóspirimder klýbtaryn, balalar-jetkinshekter sport klýbtaryn ashý, mektep jáne stýdentter sport lıgalarynyń jumysyn qaıta bastaý esebinen balalarǵa arnalǵan tegin sport seksıalaryn keńeıtý júkteldi. Sondaı-aq Qostanaı, Atyraý jáne Mańǵystaý oblystarynda sport mektep-ınternattarynyń bolmaýyna baılanysty osy óńirlerdiń ákimdikterine olardyń qurylysyn bastaý máselesin sheshý tapsyryldy. Sport nysandarynyń tolyq júktelýine erekshe nazar aýdarý máselesine ekpin qoıyldy.