Merdigermen kelisimshart buzyldy, qurylys jumystaryn buzǵany úshin kompanıadan 56,1 mln. teńge kóleminde turaqsyzdyq aıyby óndiriletin bolady
Almaty qalasy mamandandyrylǵan aýdanaralyq ekonomıkalyq sotynyń sheshimimen Álıa Moldaǵulova men Mánshúk Mámetova skverin qaıta jańartý jumystaryn júrgizgen merdiger uıym («SHAH» qurylys kompanıasy JSHS) memlekettik satyp alýdyń talaptardy tolyq oryndamaıtyn qatysýshy retinde tanyldy, dep habarlaıdy almaty-akshamy.kz.
Almaty qalasy Ekologıa jáne qorshaǵan orta basqarmasy jańa merdigerdi anyqtaýǵa qaıta konkýrs jarıalady. Konkýrstyq rásimderdiń aıaqtalýynyń boljamdy kúni - 2024 jylǵy 25 mamyr, skverdi rekonstrýksıalaý jumystarynyń tolyq oryndalýy - aǵymdaǵy jyldyń sońyna deıin.
Esterińizge sala keteıik, «Almaty q. Ekologıa jáne qorshaǵan orta basqarmasy» KMM men «Shah «Qurylys kompanıasy» JSHS arasynda skverdi abattandyrý jáne rekonstrýksıalaý jumystaryn júrgizýge shart 2022 jyldyń 15 qyrkúıeginde jasalǵan. Nysandy aıaqtaý 2023 jyldyń 31 mamyryna deıin josparlanǵan. Jobada skver aýmaǵynda ornalasqan «Odývanchık» jáne «Aqqý» sýburqaq keshenderin qaıta jańartý, tehnologıalyq jabdyqtardy, qaptaý materıaldaryn aýystyrý jáne tehnıkalyq jaılardy jóndeý jumystary kózdelgen bolatyn; qoldanystaǵy asfáltty brýschatkalarǵa aýystyrý, shaǵyn arhıtektýralyq formalardy (oryndyqtar men qoqys tastaýǵa arnalǵan jáshikterdi), avtomatty sýarý júıesin ornatý jáne drenaj júıesin, syrtqy jaryqtandyrý júıesin qaıta qurý jáne qoldanystaǵy jaryqtandyrý qurylǵylaryn aýystyrý.
Atalǵan nysanda jumystar ýaqtyly júrgizilmegendikten, Basqarma merdiger uıymmen shartty buzý, ónim berýshini memlekettik satyp alýǵa talaptardy oryndamaıtyn qatysýshy dep taný jáne turaqsyzdyq aıybyn óndirip alý týraly sotqa talap aryz joldady. Talap aryzdar tolyǵymen qanaǵattandyryldy.