QR Premer-Mınıstri Álıhan Smaıylov Máskeý qalasynda (RF) ótken Táýelsiz Memleketter Dostastyǵy úkimetteri basshylary keńesiniń kezekti otyrysyna qatysty, dep habarlaıdy Almaty-akshamy.kz
Úkimet basshysy óz sózinde Qazaqstan ıntegrasıalyq baılanystardy tereńdetý jáne ony jańa praktıkalyq mazmunmen tolyqtyrý úshin TMD alańynda odan ári birlesip jumys isteýge múddeli ekenin atap ótti.
«Memleketter basshylary keńesiniń ótken otyrysynda QR Prezıdenti Qasym-Jomart Toqaev usynǵan basymdyqtar TMD formatyndaǵy ózara is-qımyldy kúsheıtýge baǵyttalǵan. Eń bastysy – týyndaǵan syn-qaterlerdi eńserý, tıimdi áriptestikti nyǵaıtý úshin jańa baǵyttar izdeý», — dedi Álıhan Smaıylov.
Máselen, keler jyly birlesken jumystyń negizgi baǵyttarynyń biri mádenı-gýmanıtarlyq baılanystardy, sondaı-aq densaýlyq saqtaý, bilim jáne sport salalaryndaǵy ózara iyntymaqtastyqty keńeıtý bolmaq.
Premer-Mınıstr Qazaqstan 2024 jyldyń TMD elderinde Volonterlik qozǵalys jyly dep jarıalanýyn quptaıtynyn atap ótti.
«Búginde Dostastyq elderiniń eriktileri ózderiniń tynymsyz eńbekteriniń arqasynda tolerantty qoǵamnyń damýyna, qaıyrymdylyq pen meıirimdilik mádenıetin qoldaýǵa eleýli úles qosýdy jalǵastyryp keledi. Dostastyq elderi eriktileriniń jyl saıynǵy forýmyn ótkizý jáne oǵan TMD-nyń turaqty alańy mártebesin berý týraly qazaqstandyq bastamany iske asyrý boıynsha naqty jumystardy bastaýǵa shaqyramyn», — dedi Úkimet basshysy.
Densaýlyq saqtaý salasyndaǵy yntymaqtastyqty tereńdetý týraly aıta kele, Álıhan Smaıylov dene shynyqtyrý jáne sport salasynda atqarylyp jatqan jumystardyń mańyzdylyǵyna toqtaldy.
Bıyl múmkindigi shekteýli balalar arasynda TMD elderiniń spartakıadalary jáne TMD chempıonattaryn ótkizý úshin uıymdastyrý-quqyqtyq negizin qurý atalǵan baǵyttaǵy úlken jetistik bolyp otyr.
«Qazaqstan bul jumysty qoldaıdy jáne aldaǵy jarystarǵa belsendi qatysýdy josparlap otyr», — dedi Úkimet basshysy.
Onyń aıtýynsha, ózara is-qımyldyń taǵy bir mańyzdy baǵyty – Dostastyq elderiniń azamattaryna sapaly ári qoljetimdi medısınalyq kómek kórsetý.
«TMD sheńberinde ázirlengen densaýlyq saqtaý salasyndaǵy yntymaqtastyq tetikteri keń aýqymdy koronavırýstyq pandemıany eńserýge yqpal etti. Sonymen qatar bizdiń elder qazir taǵy da keń taralǵan aýrýlarmen betpe-bet kelip otyr, onyń ishinde qyzylsha indetiniń órshýin erekshe atap ótýge bolady. Osyǵan oraı densaýlyq saqtaý salasyndaǵy yntymaqtastyq jónindegi keńesti qosa alǵanda, TMD-daǵy barlyq ózara is-qımyl tetikterin jandandyrýǵa shaqyramyz», — dedi Premer-Mınıstr.
Onyń aıtýynsha, Qazaqstan Dúnıejúzilik densaýlyq saqtaý uıymynyń qoldaýymen alǵashqy medısınalyq-sanıtarıalyq kómek boıynsha elder koalısıasyn qurýdy usyndy.
«Bul aýrýdyń aldyn alý jáne densaýlyqty qorǵaý qaǵıdattaryn ilgeriletýge, birlesken usynystar ázirleýge múmkindik beredi», — dep basa aıtty Álıhan Smaıylov.
Jıyn sońynda Premer-Mınıstr TMD elderiniń mádenıet salasyndaǵy kópjosparly ózara is-qımyldy damytý jónindegi jalpy tásilderi Mádenı yntymaqtastyq perspektıvalary týraly málimdemeniń jobasynda kórsetilgenin atap ótti.
«Biz atalǵan qujatty 2022 jylǵy 14 qazanda Astanada ótken TMD samıtinde qabyldanǵan elderimizdiń basshylarynyń Mádenıet salasyndaǵy yntymaqtastyq týraly málimdemesin damytý retinde qabyldaımyz», — dep túıindedi sózin Álıhan Smaıylov.