2023 jyldyń İ toqsanynyń qorytyndysy boıynsha 17 myń otbasyǵa 372 mln teńgeden astam turǵyn úı kómegi kórsetildi
Úkimette turǵyn úı-kommýnaldyq sharýashylyq ınfraqurylymyn keshendi jańǵyrtý máseleleri talqylandy, dep habarlaıdy Almaty-akshamy.kz.
Ulttyq ekonomıka mınıstri Álibek Qýantyrovtyń baıandamasyna sáıkes, Prezıdent tapsyrmasy boıynsha ázirlengen "Tarıfti ınvestısıaǵa aıyrbastaý" baǵdarlamasyn engizý arqyly respýblıka boıynsha elektr, jylý, sýmen jabdyqtaý jáne sý tartý jelileriniń tozýyn orta eseppen 20%-ǵa tómendetý josparlanyp otyr. Bul azamattarǵa kórsetiletin qyzmetterdiń sapasyn jaqsartýǵa jáne apattyq jaǵdaılar sanyn azaıtýǵa múmkindik beredi.
Ol úshin 145 myń shaqyrymnan astam ınjenerlik jelilerdi jóndeý qajet. Osyǵan baılanysty bıyl óńirlerdegi áleýmettik-ekonomıkalyq jaǵdaıdy eskere otyryp, TKSH qyzmetteri tarıfterin kezeń-kezeńmen ózgertý kózdelip otyr. Nátıjesinde osy jyldyń ózinde 5 myń shaqyrymnan astam ınjenerlik jelilerdi jóndeý jáne TKSH salasy qyzmetkerleriniń jalaqysyn arttyrý josparlanýda.
Indýstrıa jáne ınfraqurylymdyq damý mınıstri Marat Qarabaevtyń baıandaýynsha Áleýmettik jaǵynan az qamtylǵan azamattardyń komýnaldyq qyzmetterge shyǵyndaryn azaıtý úshin olardy memleket tarapynan kórsetiletin turǵyn úı kómegi aıasynda ishinara óteý kózdelgen.
2023 jyldyń İ toqsanynyń qorytyndysy boıynsha 17 myń otbasyǵa 372 mln teńgeden astam turǵyn úı kómegi kórsetildi.
Energetıka mınıstri Almasadam Sátqalıevtyń málimetinshe, Dúnıejúzilik bank jáne KPMG halyqaralyq kompanıasymen birlesip, respýblıkanyń 56 jylý elektr stansıasyna tehnıkalyq aýdıt júrgizildi. Onyń qorytyndysy boıynsha stansıalardyń tehnıkalyq jaı-kúıi men negizgi tehnıkalyq-ekonomıkalyq kórsetkishter reıtıńi jasaldy. Osy aıdyń sońyna qaraı kúrdeli jóndeý jónindegi is-sharalar josparyn qamtıtyn keshendi esep daıyn bolmaq.
Premer-Mınıstr Memleket basshysy saladaǵy kúrdeli problemalardy eskere otyryp, eldiń tirshilik kózine qajetti barlyq júıeni jańǵyrtýǵa jáne kúrdeli jóndeýge baǵyttalǵan "Tarıfti ınvestısıaǵa aıyrbastaý" baǵdarlamasyn iske asyrýdy tapsyrǵanyn aıtyp ótti.
"Ol úshin biz zańnamalyq túzetýlerdi, normatıvtik quqyqtyq aktilerdi qabyldadyq. Buǵan deıin tabıǵı monopolıalar sýbektileriniń ınvestısıalyq baǵdarlamalary men tarıfterin túzete almaı kelgen edik. Endi oǵan múmkindik týyp otyr", — dedi Álıhan Smaıylov.
Oǵan qosa Úkimet basshysy komýnaldyq kásiporyndar tarıfti túzetý jáne jańǵyrtý prosesin bastaý úshin qajetti qujattamany baıaý daıyndap jatqanyn atap ótti.
"Bul prosesti sozbalańǵa salýǵa bolmaıdy. Jeliler men stansıalardy kúrdeli jóndeý jumystaryn jedel bastaý mańyzdy. Bul – kezek kúttirmeıtin mindet. Ásirese, bul – qurylys maýsymy qysqa jáne jylý berý kezeńi erte bastalatyn soltústik óńirler úshin ózekti másele", — dedi Premer-Mınıstr.
Úkimet basshysy qalyptasqan jaǵdaıdy Ulttyq ekonomıka mınıstrligi tarapynan ketken olqylyq dep atap ótti. Osyǵan baılanysty Álıhan Smaıylov vedomstvo basshysy Álibek Qýantyrovqa eskertý jasap, úılestirý jumystarynyń tómen deńgeıde júrgizilgeni úshin Tabıǵı monopolıalardy retteý komıtetiniń tóraǵasy Asan Darbaevqa sógis jarıalady.
"Komýnaldyq qyzmetterdiń sapasyna qatysty Prezıdenttiń jáne halyqtyń tarapynan oryndy syn estip kelemiz. Aldymyzdaǵy jylytý maýsymynda ótken qysta oryn alǵan tótenshe jaǵdaılarǵa jol bermeý kerek. Suranys qatań bolmaq", — dedi Álıhan Smaıylov.