Zertteý tájirıbesine jas shamasy 40 pen 75 aralyǵyndaǵy elý bes adam qatysqan
Ońtústik Danıa ýnıversıtetiniń ǵylymı qyzmetkerleri taǵamǵa únemi birneshe gram baldyr qosý júrek aýrýlarynyń aldyn alýy múmkin ekendigin aıtty, dep habarlaıdy Almaty-akshamy.kz BAQ.KZ-ke silteme jasap.
Taǵamǵa baldyr qosý qandaǵy holesterın deńgeıin baqylaýǵa kómektesip, aterosklerozdyń týýyna jol bermeıdi deıdi ǵalymdar. Olardyń aıtýynsha, ónim kalorıasy tómen, al ondaǵy amınqyshqyldardyń, túrli dárýmender men mıneraldardyń kólemi mol.
Baldyrlary birneshe aı boıy saqtaýǵa bolady. Sondaı-aq ǵalymdar baldyrlardyń barlyǵy birdeı adam úshin paıdaly bolmaıtynyn eskertti.
Al amerıkalyq ǵalymdar sarymsaq syǵyndysyn zerttedi. Ǵylymı jumystyń nátıjesine sáıkes, sarymsaq syǵyndysyn kúndelikti tamaqqa paıdalanǵan jaǵdaıda, ol maıly tamaqty jeý saldarynan qan tamyrynyń qabyrǵasynda paıda bolatyn túıindilerdiń sanyn azaıtýǵa kómektesedi.
Science World Report habarlaýynsha, zertteý tájirıbesine jas shamasy 40 pen 75 aralyǵyndaǵy elý bes adam qatysqan. Olardyń barlyǵy aǵzadaǵy zat almasýdyń buzylýy saldarynan semizdik belgileri bar metabolıkalyq sındrommen aýyratyn bolǵan. Bul naýqastardan endi bastalyp kele jatqan júrek aýrýy da baıqaldy.
Synaq kezinde olardyń keıbiri 2400 mıllıgram sarymsaq syǵyndysyn ishse, qalǵandaryna bul syǵyndy berilmegen. Bastapqyda qatysýshylardyń barlyǵynyń qan tamyrlaryndaǵy túıindiler men kálsı mólsheri esepke alyndy. Bir jyldan keıin osy naýqastardy qaıta teksergen kezde, sarymsaq syǵyndysyn qoldanǵan adamdardyń tamyryndaǵy túıindilerdiń 80%-ǵa deıin baıaý óskendigi anyqtaldy. Sáıkesinshe, olardyń júrek talmasymen aýrý qaýpi de azaıǵan. Mamandardyń aıtýynsha, sarymsaqtyń quramyndaǵy kómirsýtekter aǵza úshin óte paıdaly element bolyp tabylady.