Álem kýbogyna dúnıejúziniń 15 memleketinen balýandar keldi
Bıyl «Qazaqstan barysy» atanǵan qyzylordalyq balýan Maqsat Isaǵabylov Rýmynıanyń Konstansa qalasynda ótken qazaq kúresinen álem kýbogynda jeńimpaz atandy, dep habarlaıdy Almaty-akshamy.kz QazAqparatqa silteme jasap.
Álem kýbogyna dúnıejúziniń 15 memleketinen balýandar keldi.
Tartysty ótken básekede Qazaqstan quramasy jalpykomandalyq esepte birinshi oryn aldy. Jeńimpazdar men júldegerlerge medalmen birge aqshalaı syılyq berildi.
Elimizdiń úzdik balýany Maqsat Isaǵabylovqa 100 keliden joǵary salmaqta qarsylas shaq kelgen joq.
Júlde tigilgen segiz salmaqtyń jeteýinde qazaqstandyq sportshylar myqty ekenin kórsetti. Olardyń qatarynda Bekjan Tólepov, Marat Nyǵmatýllaev, Nurbolat Myrzanov, Safýan Muratbekov, Elaman Qoıshybaev pen Áset Ahmetjanovtar chempıon atandy.
Al 100 kelige deıingi salmaqta Erkinbek Bólen kamerýndyq Dolasem Dedonnege jol berip qoıdy.
Eske salsaq, budan buryn Jámıla Baqbergenova men Azamat Dáýletbekov erkin jáne áıelder kúresinen álem kýbogyna shaqyrtý alǵan edi.