QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda avıasıa salasyn odan ári damytý máseleleri qaraldy.
Kólik mınıstri Marat Qarabaev bıylǵy 11 aıda otandyq áýe kompanıalary 12,3 mln jolaýshy tasymaldanǵanyn, bul ótken jylmen salystyrǵanda 23%-ǵa artyq ekenin málimdedi. Jyl qorytyndysy boıynsha bul kórsetkishti 13 mln jolaýshyǵa jetkizý josparlanyp otyr.
Áýejaılarda qyzmet kórsetý kólemi 25%-ǵa artty. Almaty men Astanada aıtarlyqtaı ósim baıqalady, onda bıyl rekordtyq kórsetkishter tirkeldi – 9 mln (+34%) jáne 7 mln (+26%) jolaýshyǵa qyzmet kórsetildi.
Sonymen qatar áýejaılarda qyzmet kórsetilgen júkterdiń kólemi de artty. Jyl basynan beri bul kórsetkish 130 myń tonnany qurady. Ótken jylmen salystyrǵanda ósim – 16%.
Áýe tasymaldaryna ósip kele jatqan suranysty qanaǵattandyrý úshin áýejaılardyń ınfraqurylymyn jańǵyrtý jumystary jalǵasýda. Kelesi jyly Shymkent, Qyzylorda jáne Almatyda jańa jolaýshylar termınaldarynyń qurylysy aıaqtalady. Nátıjesinde Almaty áýejaıynyń ótkizý qabileti 5 esege artyp, 14 mln adamǵa deıin, Qyzylordaniki 6 esege artyp, 2 mln adamǵa deıin, Shymkenttiki 7 esege artyp, 6 mln adamǵa deıin artady.
Kelesi jyly BAÁ ınvestory astanalyq áýejaıdyń ushý-qoný jolaǵyn óz qarajaty esebinen rekonstrýksıalaýǵa kirisedi, bul – jańa basqarýshy kompanıanyń aldyna qoıylǵan birinshi kezektegi mindetterdiń biri.
Sondaı-aq 2024 jyly Memleket basshysynyń tapsyrmasyna sáıkes Pavlodar qalasy áýejaıynyń ushý-qoný jolaǵyn, sondaı-aq Balqash qalasy áýejaıynyń júrý jolaǵy men perronyn rekonstrýksıalaý jumystary bastalady.
Sonymen qatar Qaraǵandy áýejaıynda ınvestor ushý-qoný jolaǵyn jańǵyrtyp, ony qajetti arnaıy tehnıkamen jabdyqtaýdy josparlap otyr. Oǵan qosa Aqtóbe, Túrkistan jáne Qyzylorda áýejaılaryn osy salada tájirıbesi bar iri jahandyq ınvestorlarǵa senimgerlik basqarýǵa berý týraly kelissózder júrip jatyr.
Premer-Mınıstrdiń aıtýynsha, bıyl 16 halyqaralyq marshrýt ashyldy jáne qaıta jandandy. Kelesi jyly Kýala-Lýmpýr, Sıngapýr, Tokıo jáne basqa qalalarǵa jańa reıster ashý josparlanyp otyr.
Oǵan qosa áýejaılardyń ınfraqurylymy da qarqyndy damyp keledi.
«Osy salaǵa kelgen jeke ınvestorlar qazirdiń ózinde áýejaılardy damytýǵa $2,1 mlrd-qa jýyq qarajat saldy. Atap aıtqanda, Almatyda perrondy kúrdeli jóndeý jumystary júrgizilýde. Sondaı-aq júkterdi óńdeý rásimderin jetildirý sharalary qolǵa alyndy. Shymkentte jańa jolaýshylar termınalynyń qurylysy aıaqtalýǵa jaqyn. Astanada BAÁ-den kelgen kompanıa ushý-qoný jolaǵyn rekonstrýksıalaýdy, kargo-termınalyn keńeıtýdi josparlap otyr», — dedi Álıhan Smaıylov.
Oǵan qosa bul salada shuǵyl sheshimderdi qajet etetin ózekti máseleler joq emes. Atap aıtqanda, negizgi máseleniń biri – avıaotyn tapshylyǵy, ol jylyna shamamen 300 myń tonnany quraıdy.
«Máseleni sheshý úshin otyn jetkizý kanaldaryn ártaraptandyryp, ony saqtaýǵa arnalǵan tıisti ınfraqurylymdy damytý qajet», — dedi Premer-Mınıstr.
Sonymen qatar Úkimet basshysy áýejaılardy damytý da qosymsha sharalardy talap etetinin aıtty. Atap aıtqanda, áýejaı ınfraqurylymyn damytyp, júkter men jolaýshylardy rásimdeý prosesterin tolyq avtomattandyrý qajet.
«Bul 2030 jylǵa qaraı óńdeletin júk kólemin jylyna 130 myń tonnadan 1 mln tonnaǵa deıin, al jolaýshylar aǵynyn 25 mln adamǵa deıin ulǵaıtýǵa múmkindik beredi», — dedi Álıhan Smaıylov.
Taǵy bir ózekti problema – salany kadrlarmen qamtamasyz etý. Búginde ushqyshtar, ınjenerler men tehnıkalyq personaldar jetispeıdi.
«Reısterdiń keshigýi de qalypty ádetke aınalyp barady. Oǵan qolaısyz aýa raıy ǵana sebepshi emes. Sondyqtan áýe kompanıalary jolaýshylar men ushaqtarǵa qyzmet kórsetý sapasyn jaqsartyp, áýe parkin keńeıtýi qajet», — dedi Úkimet basshysy.
Joǵaryda aıtylǵandardy eskere otyryp, Premer-Mınıstr áýejaılar aýmaǵynda mýltımodaldy kólikti paıdalaný múmkindigin berý máselesin pysyqtaýdy, tranzıttik júkterdi rásimdeýdi jeńildetip, tıisti tehnologıalyq prosesterdi ońtaılandyrýdy tapsyrdy.
Odan bólek Úkimet basshysy qajetti avıaotyn kólemimen qamtamasyz etý sharalaryn qabyldaý, ony saqtaýǵa arnalǵan tıisti ınfraqurylymdy qurý, sondaı-aq azamattyq avıasıa salasynda mamandar daıarlaý úshin qosymsha granttar bólýdi qamtamasyz etý qajettigin aıtyp ótti.