Qazaqstan – Túrki álemi, Túrki memleketteri úshin árqashan qasıetti Qarashańyraq, Atajurt.
Ázerbaıjannyń "Máńgilik Birlik" jastar uıymynyń kezekti qonaǵy "Alatau-Aqparat" medıa holdıńiniń bas dırektory Erjan Qalymbaıuly boldy.
Zým áleýmettik jelisi arqyly ótken kezdesýge Ázerbaıjan, Túrkıa jáne ózge de túrki elderiniń belsendi jastary, sonymen birge, Ázirbaıjannyń Turan mýzykalyq tobynyń jetekshisi Elshad Alekperov qatysyp, suraqtar qoıdy.
Óz sózinde Erjan Qalymbaıuly Qazaqstannyń Túrki álemindegi róli, sondaı-aq Ázerbaıjan men Qazaqstan arasyndaǵy baılanystyń nyǵaıyp kele jatqany týraly naqty mysaldarmen aıtyp berdi.
Onyń sózinshe, Qazaqstan – Túrki álemi, Túrki memleketteri úshin árqashan qasıetti Qarashańyraq, Atajurt. Sondyqtan túrki birligin qalyptastyrýda mańyzy zor naqty bastamalary arqyly iri qadamdar jasap keledi. Ol sondaı-aq 2009 jyly Nahchyvan deklarasıasy nátıjesinde qurylǵan Túrik memleketteri uıymynyń túrkilik ıntegrasıaǵa sony serpin berdi dep sanaıdy.
Qazir jyl saıyn quryltaı ótedi, barlyq salada mınıstrler deńgeıinde naqty jumystar kúrgizilip jatyr. Túrki elderiniń kóshbasshylary tek atalǵan uıym sheńberinde ǵana emes, ekijaqty kezdesýlerde de ózara baılanysty kúsheıtken. Ásirese, Qazaqstan Prezıdenti Qasym-Jomart Toqaev pen Ázerbaıjan Prezıdenti Ilham Álıev arasyndaǵy qarym-qatynas baýyrlas elder baılanysyn jańa deńgeıge shyǵardy.
Sonymen qatar, Erjan Qalymbaıuly Ázerbaıjan memleket basshysynyń uzaqmerzimdi aqyldy ári kóregen saıasaty arqasynda óz jerin keri qaıtaryp alýyn Túrki Álemi úshin, jalpy qazirgi syn-qaterge toly jahan saıasatyndaǵy erekshe oqıǵa dep baǵalaıtynyn jetkizdi.
"Máńgilik Birlik" jastar uıymynyń tóraǵasy Shahın Álıev te mol maǵlumat bergen qonaqqa alǵysyn aıta otyryp baýyrlas el basshylarynyń ekonomıkalyq, saıası jáne mádenı baılanystardy qarqyndy damytýda erekshe ról atqaryp otyrǵanyna toqtaldy.