Premer-Mınıstr Álıhan Smaıylov Nur-Sultan jáne Almaty qalalaryn baılanystyratyn «Ortalyq-Ońtústik» halyqaralyq tranzıttik dáliziniń bir bóligi «Qaraǵandy-Balqash-Saryshaǵan» avtojolyn (1492,4-2005 km ýchaskesi) rekonstrýksıalaý barysymen tanysty, dep habarlaıdy Almaty-akshamy.kz.
«QazAvtoJol» UK» AQ basqarma tóraǵasy Meıirhat Qasymbaevtyń aıtýynsha, jobany 2023 jyldyń jeltoqsanynda tolyq aıaqtaý josparlanǵan.
Onyń aıtýynsha, bıyl jol jamylǵysynyń qurylymdyq qabattaryn tóseý, jasandy qurylystardy montajdaý jáne jol-qurylys materıaldaryn daıyndaý jumystary jalǵasady. Máselen, respýblıkalyq mańyzy bar «Qaraǵandy-Balqash» jáne «Balqash-Býrylbaıtal» jáne t.b. avtojoldarda keń aýqymdy jol-qurylys jumystary júrgizilip jatyr. Jumystar barlyq 8 ýchaskede qaıta bastaldy.
Sonymen qatar kólik qozǵalysy aınalma jáne topyraq tóselgen joldarmen júzege asyrylatyn ýchaskelerdiń sanyn qysqartýǵa basa nazar aýdarylady. Rekonstrýksıalaý jumystary aıaqtalǵannan keıin bul trassalar tórt jolaqty İ tehnıkalyq sanatqa sáıkes keletin bolady.
«Joba jol júrý ýaqytyn aıtarlyqtaı qysqartyp, qaýipsiz jáne jaıly qozǵalysty qamtamasyz etedi. Jańartylǵan avtojol Balqash kóliniń týrısik klasterin damytýdyń draıverine aınalady jáne jańa jumys oryndaryn qurýǵa yntalandyrady», — dedi Álıhan Smaıylov.
Sondaı-aq Qaraǵandy oblysynyń ákimi Jeńis Qasymbek úkimettik delegasıa múshelerin óńirdiń jol-kólik ınfraqurylymyn damytý barysy týraly habardar etti, onyń nátıjesinde kólik áleýeti artyp, birqatar joldar joǵary tehnıkalyq sanatqa aýystyrylýy tıis.
Úkimet basshysy baıandamamen tanysyp, oblys basshylyǵyna birqatar tıisti tapsyrma berdi.