Álıhan Smaıylov joldardyń sapasyn synǵa aldy
Premer-Mınıstr Álıhan Smaıylovtyń tóraǵalyǵymen ótken Memleket basshysynyń Saılaýaldy baǵdarlamasyn iske asyrý jónindegi respýblıkalyq shtab otyrysynda avtomobıl joldaryn salý jáne rekonstrýksıalaý máseleleri qaraldy, dep habarlaıdy Almaty-akshamy.kz Úkimettiń telegram kanalyna silteme jasap.
2030 jylǵa deıin 8 myń shaqyrym respýblıkalyq jáne 14 myń shaqyrym jergilikti avtojoldardy sapaly salý men rekonstrýksıalaý mindeti qoıylǵan.
Bıyl 11 myń shaqyrym avtomobıl joldary, onyń ishinde 7 myń shaqyrym respýblıkalyq jeli jóndeý jumystarymen qamtylady.
Búgingi tańda 70 myń shaqyrym jergilikti joldardyń 85%-nyń jaǵdaıy qalypty.
Jambyl (97%), Mańǵystaý (96%) jáne Pavlodar (91%) oblystarynda jergilikti joldardyń jaı-kúıi jaqsy.
Elimizdiń úsh óńirinde kórsetkishter ortashadan tómen: Batys Qazaqstan (46%), Aqtóbe (72%) jáne Atyraý (72%) oblystarynda.
Úkimet basshysy sońǵy ýaqytta avtomobıl joldarynyń sapasyna qatysty shaǵymdar kóp ekenin atap ótti. Joldyń nasharlyǵy jol apatyna sebepshi bolyp, adamdardyń ólimine ákeledi, tranzıttik tasymal kólemin azaıtady, sonymen qatar eldiń ımıjine teris áser etedi.
«Júrgizilip jatqan jóndeý jumystaryna jurtshylyq qanaǵattanbaı otyr. Internette jumystyń reglament boıynsha emes, jańbyr, tipti qar jaýyp jatqan kezde júrgizilip jatqany túsirilgen kóptegen beınerolık pen fotosýretter tolyp júr», — dedi Álıhan Smaıylov.
Mysal retinde Úkimet basshysy Abaı oblysy Kókterek aýylynda qardyń ústine asfált tóselgenin, al Pavlodar oblysynda asfáltty jolǵa shashyp tastaǵanyn aıtty. Keıbir óńirlerde aýyl turǵyndary jergilikti atqarýshy organdardan qaıyr kútpeı, joldardy óz betinshe jóndeıtin jaǵdaılar kezdesedi. Almaty oblysy Rysqulov aýylynda, Mańǵystaý oblysy Atameken aýylynda osyndaı jaǵdaılar oryn aldy. Sonymen qatar bir ýchaskede jyl saıyn jóndeý jumystary júrgizilgen faktiler bar.
Álıhan Smaıylov jol salý ádisterin túbegeıli ózgertýdi talap etti.
Sonymen qatar Premer-Mınıstr osy jyldyń sońyna deıin «Merke-Býrylbaıtal», «Aqtóbe-Atyraý-Astrahan», «Almaty-Óskemen», «Ónege-Beısen», «Kaztalovka-Jánibek», «Úsharal-Dostyq» sıaqty mańyzdy avtojol jobalarynyń aıaqtalýyn qamtamasyz etýdi tapsyrdy.
