Úkimet basshysy óńirlik yntymaqtastyqtyń árqashan Qazaqstannyń basymdyqtarynyń biri bolǵanyn atap ótti.
QR Premer-Mınıstri Álıhan Smaıylov Almatyda ótip jatqan «COVID-ten tys jerde – Ortalyq Azıany ádildik negizinde qalpyna keltirý jolynda» taqyrybyndaǵy Turaqty damý maqsattary boıynsha ekinshi óńirlik samıtte osylaı dedi, dep habarlaıdy Almaty-akshamy.kz
Sondaı-aq Álıhan Smaıylov Qazaqstannyń BUU-nyń 2030 jylǵa deıingi kún tártibin qoldaıtynyn, buǵan Turaqty damý maqsattarynyń ındıkatorlaryn ulttyq strategıalar men damý baǵdarlamalaryna engizý dálel ekenin atap ótti. Elimizge júktelgen mindettemelerdi iske asyrý úshin TDM jónindegi úılestirý keńesi jumys isteıdi.
QR Premer-Mınıstri búginde kóptegen elder úshin basty máselelerdiń biri azyq-túlik qaýipsizdigin qamtamasyz etý bolyp otyrǵanyn atap ótti.
Osyǵan oraı, BUU Azyq-túlik jáne aýyl sharýashylyǵy uıymynyń álemdik naryqtaǵy baǵanyń odan ári ósýi yqtımal degen boljamyn eskere otyryp, Qazaqstan agroónerkásip kesheniniń áleýetin damytý jáne ónimdiligin arttyrý jónindegi qadamdardy jandandyrady.
«İlgerileý men jahandyq maqsattarǵa qol jetkizý úshin ulttyq jáne aımaqtyq deńgeılerde batyl áreket etý jáne tyǵyz áriptestik qajet. Bizdiń elder arasyndaǵy yntymaqtastyq pen ózara is-qımyldy odan ári keńeıtý BUU qurylymdarynyń belsendi qatysýymen turaqty jáne órkendegen Ortalyq Azıa qurýǵa yqpal etetinine senimdimin», — dedi Álıhan Smaıylov.