Qarjy mınıstri 950 mlrd teńge jumsalǵanyn jetkizdi.
Premer-Mınıstrdiń orynbasary – Qarjy mınıstri Erulan Jamaýbaev Senattyń jalpy otyrysynda ótken jyly memleket óziniń áleýmettik mindettemelerin tolyq kólemde oryndaǵanyn habarlady, dep habarlaıdy Almaty-akshamy.kz Egemen.kz silteme jasap.
Erulan Jamaýbaev byltyrǵy kirister boıynsha jospar 156 mlrd teńgege asyra oryndalǵanyn aıtty.
«Búdjetke 7,4 trln teńge tústi. Salyq túsimderi 7,1 trln teńgeni nemese 102,1%-dy qurady. Salyq boıynsha asyra oryndaýdyń negizgi somasy korporatıvtik tabys salyǵyna, shıki munaıǵa, eksport, keden bajyna jáne ımportqa qosylǵan qun salyǵyna tıesili boldy. Salyq túsimderin ulǵaıtýdyń negizgi faktorlary ekonomıkanyń birtindep jandanýy men salyq ári keden salasyn ákimshilendirýdi jetildirý boldy. Sońǵy 3 jylda salyq pen keden salasyn ákimshilendirý men sıfrlandyrýdan búdjetke 2 trln teńgeden astam qosymsha túsimder qamtamasyz etilgenin atap ótkim keledi», - dedi mınıstr.
Onyń aıtýynsha, 2021 jyldyń qorytyndysy boıynsha Qytaı Halyq Respýblıkasynyń eksporty – Qazaqstan Respýblıkasynyń ımporty baǵyty boıynsha statısıkalyq derekterdegi alshaqtyq 40,5%-ǵa deıin tómendedi.
Premer-Mınıstrdiń orynbasary búdjet shyǵystary jaıly sóz qozǵady.
«2021 jyly búdjet shyǵystary 56 strategıalyq baǵytty qamtydy jáne damý josparlarynyń 263 ındıkatoryna qol jetkizildi. Ulttyq jobalar men memlekettik baǵdarlamalardy iske asyrý eldiń áleýmettik-ekonomıkalyq damýyna oń áser etti. Máselen, ótken jyly 17 mln sharshy metrden astam turǵyn úı paıdalanýǵa berildi. Qalalar men aýyldarda 5,3 myń shaqyrymǵa jýyq sýmen jabdyqtaý jelileri salyndy. Jergilikti mańyzy bar 1 287 shaqyrym avtojol jańǵyrtyldy. Kóliktiń barlyq túrlerimen júk tasymaldaý kólemi 3,7 mlrd tonnany qurady. Agroónerkásiptik keshende 24 myńnan astam ınvestısıalyq joba sýbsıdıalaýmen qamtyldy», - dedi Premer-Mınıstrdiń orynbasary.
Ol sondaı-aq muǵalimder men dárigerlerdiń jalaqysy kóterilgenine nazar aýdardy.
«Bilim berý, densaýlyq saqtaý jáne mádenıet salasynda pedagogtardyń, dárigerlerdiń, mádenıet jáne halyqty áleýmettik qorǵaý qyzmetkerleriniń eńbekaqysy kóterildi. Tek osy maqsattardyń ózine shamamen 950 mlrd teńge jumsaldy. Epıdemıaǵa qarsy sharalardy júrgizýge 422 mlrd teńgeden astam qarajat bólindi. Jalpy pandemıaǵa qaramastan, memleket óziniń áleýmettik mindettemelerin tolyq kólemde oryndady», - dedi Erulan Jamaýbaev.