«ALMATY AQSHAMY» – 35 «Aqsham» ardagerleri
«Almaty aqshamy» maǵan nege ystyq? 1990 jyldardyń basynda Táýelsizdiktiń jyly lebi ese bastaǵan ýaqytta gazetke óndiristik tájirıbeden ótýge keldim. Ýnıversıtetti bitiretin kezim, besinshi kýrsta oqımyn. Jastyq maksımalızm bar. Qaıtpaı, sharshamaı jumys isteıtin ýaqyt. Qaı jerge jumsasa da, shamam kelgenshe tyndyrymdy atqaryp kelýge tyrysamyn. Sóıtip júrip bir aı óndiristik tájirıbe ýaqyty da óte shyqty.
Áli kúnge deıin taqyryptary esimde. «Dorojnık» nege dabyl qaǵady?» «Almagúl» turǵyndary nege alańdaıdy?» jáne osy taqylettes taǵy basqa ondaǵan maqalalarym jaryqqa shyqty. Jas túlekterdi izdep jatqan ýaqyt. Gazettiń Bas redaktory Islam Beısebaev jarty stavkada jumys isteýge usynys jasady. Qara shańyraq KazGÝ-di endi bitireıin dep otyrǵan stýdentke bul úlken kómek, qýanysh boldy. Sóıtip, «Almaty aqshamy» gazetine besinshi kýrsta jumysqa ornalastym.
Joǵary oqý ornyn bitirgenimiz týraly qolǵa dıplom alǵannan keıin 1991 jyldyń tamyz aıynda «Jas Alash» gazeti tilshilikke shaqyrdy. Biraq «Almaty aqshamy» gazeti men úshin úlken alǵashqy mektep boldy. Redaksıada Islam Beısebaev, Baqytjan Jıenǵalıev, Sarqyt Ysqaqova, Qaırat Álimbekov, Júsip Erǵalıev (jatqan jerleri jaıly bolsyn) jáne Bolat Jetekbaı, Qanat Qaıym, Júnis Omar, Seısenhan Mahanbet, Kádirbek Qunypıauly, Serik Qarajan, Raýshan Imasheva syndy saıypqyran jýrnalısermen birge tilshilik jumystyń qyr-syryna qanyqtym.
Aqıqaty, «Almaty aqshamy» gazetiniń jýrnalıseri elimizdiń táýelsizdik alýyna aıryqsha úles qosty. Almatydaǵy kóshe attaryn ózgertýde erekshe eńbek sińirdi dep oılaımyn. Tipti, kóshe attaryn ózgertýge qatysty belgili tulǵalar men oqyrmandardan redaksıaǵa esepsiz hattar ákeletin. Munyń bári gazet betinde jarıalanyp, usynystar qalalyq ákimshilikke joldanyp otyrdy.
Ekinshiden, sol ýaqytta gazet betinde tarıhı máseleler óte kóp jazyldy. Esimde, N.Myńjanıdiń «Qazaqtyń qysqasha tarıhy» jáne «Qazaqtyń mıf ańyzdary» atty eńbekteri nómir saıyn qytaı tilinen aýdarylyp berilip otyrdy. Qazaqqa buryn málim bolmaǵan basqa da tarıhı týyndylar jıi jarıalandy. Ult tarıhyna degen yntyzarlyq meni ózine tartqan bolar, «Almaty aqshamy» gazetinde tarıhı máselelerdiń jazylýy» degen taqyrypta dıplomdyq jumysymdy qorǵadym.
Mine, sodan beri 35 jylǵa jýyq ýaqyt ótipti. Biraq bári de keshegideı kóz aldymda. Qazir «Almaty aqshamy» respýblıkalyq deńgeıdegi irgeli basylym ekenin ekiniń biri moıyndaıdy. Baǵalaıdy. Basylym jańardy, irgesi keńeıdi, zamanaýı gazetke aınaldy. Sondyqtan jýrnalısıkada men úshin alǵashqy mektep bolǵan «Almaty aqshamy» gazeti ǵumyrly bolsyn deımin.