Qazirgi tańda «Áleýmettik kodeks» ázirlenip jatyr.
Onyń aıasynda áleýmettik qyzmetkerlerdiń mártebesin kóterý josparlanyp otyr. Bul týraly búgin Astana qalasynda atalǵan salanyń úzdik mamandaryn marapattaý barysynda Eńbek jáne halyqty áleýmettik qorǵaý vıse-mınıstri Erbol Ospanov aıtty, dep habarlaıdy Almaty-akshamy.kz QazAqparat saıtyna silteme jasap.
«Áleýmettik qyzmetkerlerdiń jalaqysy - orta eseppen 220 myń teńge. Osyny eskere otyryp, biz myna «Áleýmettik kodekstiń» aıasynda áleýmettik qyzmetkerlerdiń statýsyn ózgertýdi, kóterýdi kózdep otyrmyz. Sol zańnamanyń aıasynda birinshi – mártebesi kóteriledi, ekinshi – olarǵa qoıylatyn talaptar ózgeredi, úshinshi – olardyń jalaqy máselesi qaralady. Ol úshin bizdiń mınıstrlikte arnaıy jumys toby qurylǵan. Osy jyldyń sońyna deıin sol jumys toby óziniń jalaqy, mártebe jaıynda usynystaryn beredi. Sosyn onyń barlyǵy zańǵa engiziletin bolady», - dep málim etti Erbol Ospanov.
Onyń aıtýynsha, búginde Qazaqstanda 12 myńǵa jýyq áleýmettik qyzmetker bar. Olar halyqtyń ártúrli sanattaryna ómir súrý sapasyn jaqsartý jáne kúrdeli ómirlik jaǵdaıdan shyǵý úshin kómek kórsetý maqsatynda arnaýly áleýmettik qyzmetter kórsetedi.
Atalǵan sala mamandarynyń 45 paıyzy – aýdan ortalyqtary men qalalarda, 30 paıyzy – oblys ortalyqtary men respýblıkalyq mańyzy bar qalalarda, 25 paıyzy – aýyl okrýgterinde eńbek etedi.