Túrkıanyń Ankara qalasynda «Qazaq ultynyń aǵartýshysy: Muhtar Áýezov» atty halyqaralyq konferensıa ótti.
Shara halqymyzdyń uly jazýshysy, ǵulama ǵalym Muhtar Áýezovtyń 125 jyldyq mereıtoıyna oraı uıymdastyryldy. Oǵan Túrkıanyń belgili aqyn-jazýshylary men ǵalymdary jáne qoǵam qaıratkerleri qatysty, dep habarlaıdy Almaty-akshamy.kz
Jazýshynyń eńbekterin jergilikti oqyrmanǵa jaqynyraq tanystyrý úshin túgeldeı túrik tiline aýdarý máselesi qarastyrylyp jatyr. Shara barasynda Zeınolla Qabdolovtyń «Meniń Áýezovym» kitabynyń túrikshe nusqasy tanystyryldy.
«Biz Muhtar Áýezovtyń tek Qazaqstanda nemese Qyrǵyzstanda emes búkil álemde tanyp bilse dep qalaımyz. Jastar onyń shyǵarmalarynan adamgershilik pen mádenıetti úırense eken deımiz. Onyń ústine bıyl Qazaqstan men Túrkıa arasyndaǵy dıplomatıalyq qarym-qatynastyń ornaǵanyna 30 toldy. Osy oraıda eki el arasynda dıplomatıalyq qana emes mádenı baılanystarymyz da keńeıip, nyǵaıa tússe dep tileımin», - deıdi TÚRKSOI Halyqaralyq uıymy tóraǵasynyń orynbasary Bılál Chakyjy.
«Bul kitapty Túrksoıdyń jobasy retinde qystan beri men aýdardym. Ózim Abaıdyń, Muhtardyń aýylynda, jaılaýynda týyp-ósken qyz bolǵandyqtan, bul baqyttyń maǵan buıyrǵanyna óte qýanyshtymyn. Aýdarý ońaı dep aıta almaımyn. Biraq sonda da qýanyshtymyn osy istiń basy-qasynda bolǵanym úshin», - deıdi "Meniń Áýezovym" kitabynyń aýdarmashysy Ásem Erejepqyzy.