Kezekte turǵan azamattardyń sany – 622 840.
Elimizde áleýmettik osal topqa jatpaıtyn 373 myń adam baspana kezeginde tur, dep habarlaıdy Almaty-akshamy.kz.
«2022 jyldyń 9 qarashasyndaǵy jaǵdaı boıynsha jergilikti atqarýshy organdarda turǵyn úı kezeginde turǵan azamattardyń sany – 622 840. Sonyń ishinde halyqtyń áleýmettik jaǵynan osal toptaryna jatatyn azamattardyń sany – 249 881», - delingen Indýstrıa jáne ınfraqurylymdyq damý vıse-mınıstri Erkebulan Daýylbaevtyń QazAqparat saýalyna joldaǵan jaýabynda.
Mınıstrdiń orynbasary «7-20-25» baǵdarlamasynyń ornyna usynylǵan jańa ıpotekany «jumysshy orta topqa arnalǵan» baǵdarlama retinde sıpattap otyr.
«Ipotekalyq nesıeleýdi sýbsıdıalaý ónimi jumysshy orta topqa arnalǵanyn atap ótken jón. Sonymen qatar, halyqtyń áleýmettik jaǵynan osal toptary úshin qoldanystaǵy turǵyn úı jaǵdaılaryn jaqsartýǵa baǵyttalǵan memlekettik qoldaý sharalaryn paıdalanýǵa quqyly», - dep jazady Erkebulan Daýylbaev.
Eske sala keteıik, mınıstrlik jańa ıpotekalyq baǵdarlamanyń sharttaryn «Ashyq NQA» portalynda jarıalap, kópshilik talqysyna usynǵan bolatyn.
Vıse-mınıstrdiń málimeti boıynsha, buıryq jobasy búginde Ulttyq ekonomıka jáne Qarjy mınıstrlikteriniń kelisimin almaǵan.
«Aldaǵy ýaqytta joǵaryda atap ótken mınıstrlikter kelisimin bergen jaǵdaıda, buıryq jobasy Ádilet mınıstrliginen tirkeýden ótip, Qazaqstan Respýblıkasy Qarjy mınıstrliginiń qarjylandyrýynan soń ótinishter azamattardan qabyldanatyn bolady», - deıdi mınıstrdiń orynbasary.