Májilis «2024-2026 jyldarǵa arnalǵan respýblıkalyq búdjet týraly» zańǵa engiziletin túzetýlerdi qabyldady., dep habarlaıdy aqshamnews.kz.
Zań jobasy respýblıkalyq búdjet parametrleriniń ózgerýine baılanysty ázirlendi. Qazaqstan Respýblıkasynyń 2024-2028 jyldarǵa arnalǵan áleýmettik-ekonomıkalyq damý boljamyna búdjet jáne Ulttyq qordyń 2024 jylǵa arnalǵan parametrleriniń boljamyn naqtylaý maqsatymen ózgerister engizildi.
Transfertter túspesten 2024 jylǵa arnalǵan respýblıkalyq búdjet kiristeriniń naqtylanǵan boljamy 14,1 trln teńge somasynda aıqyndaldy, bul bekitilgen boljamdy jospardan 2 trln teńgege az. Atap aıtqanda, salyq túsimderiniń 3 trıllıon teńgege tómendeýi, salyqtyq emes túsimderdiń 1 trıllıon teńgege, al negizgi kapıtaldy satýdan túsetin túsimderdiń 3,3 mıllıard teńgege artýy boljanyp otyr. Nátıjesinde Ulttyq qordan túsetin nysanaly transfert 2 trln teńgege ulǵaıyp, 3,6 trln teńge alý josparlanýda. Qarajat óńirlik ósý deńgeıin ustap turýǵa jáne JİÓ ósý qarqynynyń tómendeý táýekelderi jaǵdaıynda áleýmettik mańyzy bar jáne strategıalyq mańyzdy ınfraqurylymdyq jobalardy qarjylandyrýǵa baǵyttalatyn bolady.