Búgin Almatyda Qytaıdaǵy Qazaqstan týrızmi jylynyń jabylýyna arnalǵan forýmǵa qatysýshylar KazakhTourism UK AQ men otandyq tanymal ánshi arasyndaǵy birlesken jobanyń jumysyna birinshi bolyp kýá boldy, dep habarlaıdy aqshamnews.kz.
Týǵan el týraly patrıottyq kompozısıa Qazaqstannyń baı tabıǵaty men mádenıetin keń aýdıtorıaǵa pash etedi. «Kıeli mekenim» jańa beınebaıany Qazaqstannyń kórikti jerlerine nazar aýdarady. Kórermender kórnekti týrısik oryndarǵa vızýaldy saıahat jasaı alady. Onyń ishinde Sharyn shatqaly, Kólsaı kólderi, Aqmeshit úńgiri, Áziret-Sultan murajaı-qoryǵy, Bozjyra shatqaly, Torysh alqaby tárizdi biregeı oryndar bar. Vıdeoda Býrabaı, Katonqaraǵaı, Altyn-Emel, Jońǵar-Alataý ulttyq parkteriniń kadrlary da usynylǵan.
«Biz Dımashqa elimizdi shetelde dáripteýge qosyp júrgen baǵa jetpes úlesi úshin alǵys bildiremiz. Ol týrızmniń alǵashqy elshisi bolyp, árbir qolaıly jaǵdaıda sheteldik aýdıtorıany Qazaqstanǵa kelýge shaqyrady. Mıllıondaǵan tyńdaýshylar Dımashtyń shyǵarmashylyǵy arqyly bizdiń elmen keńinen tanysady. Jańa beınebaıan - Qazaqstannyń ádemi tabıǵaty men baı mádenıetiniń alýan túrliligin kórsetýge degen ortaq umtylysymyzdyń nátıjesi. Biz álemniń túkpir-túkpirindegi Dımashtyń jankúıerleri biregeı lokasıalardan shabyt alyp, elimizdi ózderi úshin ashatynyna senimdimiz»,- dep atap ótti «Kazakh Tourism» UK» AQ Basqarma tóraǵasy Qaırat Sádýaqasov.
Jańa «Kıeli mekenim» beınebaıany Dımashtyń resmı arnalary men akkaýnttarynda qoljetimdi bolady. Aıta keteıik, túsirilim Almaty, Túrkistan, Mańǵystaý oblystary týrızm basqarmalarynyń, sondaı-aq «Visit Alatau» jáne «Open Turkistan» týrısik aqparattyq ortalyqtarynyń, «Captas» ortalyǵynyń, «Air Astana» jáne «FlyArystan» avıakompanıalarynyń, «Karavansaray Turkistan» kesheniniń, «Visit Aktay» jáne «İntegra Construction KZ» kompanıalarynyń qoldaýymen ótti.