Elimizde sońǵy tórt aptada (1-28 naýryz) áleýmettik mańyzy bar jeti azyq-túlik túriniń baǵasy tómendedi, dep habarlaıdy Almaty-akshamy.kz BAQ.KZ-ke silteme jasap.
Al, naýryz aıynyń sońǵy aptasynda, 20-28 naýryz kúnderi, kartop 0,7%-ǵa, pıaz 0,3%-ǵa, aq qyryqqabat 0,1%-ǵa, qaraqumyq jarmasy 1,3%-ǵa, kúnbaǵys maıy 1,1%-ǵa jáne túıirshiktelgen qant 0,8%-ǵa arzandaǵan.
Degenmen, birinshi surypty bıdaı uny jáne odan jasalǵan nan, taýyq eti, maılylyǵy 2,5% pasterlengen sút sıaqty áleýmettik mańyzy bar ónimderdiń quny ózgerissiz qaldy.
Ótken jyly bul kórsetkish múldem basqa bolǵan. Bıyl birshama arzandaǵanyn baıqaýǵa bolady. Byltyrǵy jyldyń azyq-túlik baǵasyn eske túsireıik. Máselen, aıdyń sońǵy aptasynda, 24-29 naýryz kúnderi, kartop birden 2,6%-ǵa, al aı basynan beri 15%-ǵa, sábiz 3,9%-ǵa qymbat bolǵan. Naýryzdyń sońǵy aptasynda qant 1%-ǵa, al aı basynan beri 35%-ǵa qymbattaǵan edi. Osylaısha, bıylǵy naýryz aıyndaǵy baǵa ótken jylmen salystyrǵanda oń nátıjesin berip otyr.
Esterińizge sala keteıik, Saýda jáne ıntegrasıa mınıstri Serik Jumanǵarın aqpan aıynda kókónisterge taýarlyq ıntervensıalar baǵasyn turaqtandyrýǵa baǵyttalǵan basqa da sharalar bastalǵanyn, buǵan deıin qant ónerkásibine qoldaý kórsetetinin málimdegen bolatyn.
Óńirlerde de azyq-túliktiń arzandaǵanyn baıqaýǵa bolady. Atap aıtqanda, bir aptadan beri kartop ónimi Aqtaý, Aqtóbe, Atyraý, Jezqazǵan, Kókshetaý, Qaraǵandy, Qonaev, Qostanaı jáne Qyzylorda qalalarynda arzandaǵan. Al, pıaz ben qyryqqabattyń baǵasy baǵasy Astana, Jezqazǵan, Qostanaı, Qyzylorda, Oral jáne Túrkistanda qalalarynda tómendedi.
Aıta ketetin jaıt, Premer-Mınıstr Álıhan Smaıylovtyń naýryz aıynda Qazaqstanda ınflásıa tómendeı bastaıdy degen boljamy shyndyqqa aınaldy.