Ákimdikter baqylamaǵandyqtan, áleýmettik kómir maqsatsyz satylǵan. Bul týraly Indýstrıa jáne ınfraqurylymdyq damý mınıstri Marat Qarabaev Úkimet otyrysynda aıtty, dep habarlaıdy Almaty-akshamy.kz Azattyq Ruhy-na silteme jasap.
«Aldaǵy 2023 - 2024 jyldardaǵy jylý maýsymyna daıyndyq maqsatynda mınıstrlik búdjettik uıymdar men halyqty kómirmen qamtamasyz etý boıynsha naqty merzimderi kórsetilgen is-sharalar josparyn ázirlep, jergilikti atqarýshy organdarǵa joldady. Aldaǵy jylytý kezeńinde komýnaldyq-turmystyq kómirdiń jetispeýshiligin boldyrmaý maqsatynda mınıstrlik kómir óndirýshi kásiporyndardy qospaǵanda, kómirdi avtokólikpen (6 aı merzimge) jáne temirjol kóligimen áketýdi shekteýge baǵyttalǵan aldyn alý sharalaryn qabyldap jatyr», - dedi mınıstr.
Ótken kezeńdegi tájirıbe kórsetkendeı, jylý maýsymy qyzǵan shaǵynda áleýmettik kómirdiń satý núktelerinen shetke ketý faktileri boldy.
«Máselen, elimizdiń 5 óńirinde (Soltústik Qazaqstan, Jambyl, Túrkistan, Qyzylorda jáne Almaty oblystary) 400 myń tonnaǵa jýyq kómir shetke ketti. Ákimdikter tarapynan baqylaýdyń bolmaýyna baılanysty, birqatar óńirlik operatorlar áleýmettik kómirdi maqsatsyz, ıaǵnı bıznes sýbektilerine sata bastady (sement, kirpish zaýyttary jáne jylyjaı sharýashylyqtary)», - dedi ol.
Tótenshe jaǵdaılar mınıstrliginiń respýblıkalyq daǵdarys ortalyǵynyń derekterine sáıkes, 2022-2023 jyldardaǵy jylý maýsymy kezinde tirshilikti qamtamasyz etý júıesinde 185 tehnologıalyq aqaý bolǵan.
«Bul negizinen ınjenerlik-kommýnıkasıalyq jelilerdiń tozýyna baılanysty boldy. Jergilikti atqarýshy organdardyń jedel derekterine sáıkes, 2022 jyldyń qorytyndysy boıynsha jylýmen jabdyqtaý jelileriniń jalpy uzyndyǵy shamamen 14 myń shaqyrymdy quraıdy. 3 Jelilerdiń ortasha tozýy - 54% (7,5 myń km aýystyrýdy qajet etedi). Bul rette, eń joǵary tozý Pavlodar (82%), Abaı (68%), Qaraǵandy (68%), Shyǵys Qazaqstan (66%) jáne Soltústik Qazaqstan (65%) oblystarynda saqtalyp otyr», - dedi mınıstr.