Ótken aptada qazaqstandyq sportshylar birneshe jetistikke jetti. Aldymen Angelına Lýkas álem chempıony ataǵyn jeńip alsa, kúni keshe Qatar astanasy Dohada ótip jatqan sý sport túrlerinen álem chempıonatynda Edýard Kım men Nargıza Bolatova ártistik júzýden altyn medal jeńip aldy
Sonymen ótken aptada qazaqstandyq sportshylarymyzdyń jetistigin tizbektesek.
Kónkımen júgirý: Japonıanyń Hatınohe qalasynda máresine jetken kónkımen júgirýden jastar arasyndaǵy Álem kýboginiń kezeńinde Qazaqstan sportshylary úzdikter qatarynan kórindi. 1000 metrge jarysta neo-senor sanatynda Ulttyq quramanyń 2 sportshysy júldege qol jetkizdi. Margarıta Artemeva 2-shi nátıje kórsetip, kúmis júldeger atansa, Marıa Kýznesova qolaǵa ıe boldy. Qyzdar arasyndaǵy komandalyq neo-senorlar jarysynda ulttyq qurama sportshylary top jarsa, jasóspirim qyzdar sanatyndaǵy ulttyq qurama kúmis júldege ıe boldy. Al jasóspirim uldar jáne neo-senor básekesinde jerlesterimiz qola júldeger atandy. Sonymen qatar Kanadanyń Kvebek qalasyndaǵy eresekter arasyndaǵy Álem kýboginiń kezekti kezeńinde jerlesterimiz alǵash ret komandalyq sprıntte qola júldege qol jetkizdi. Atalǵan básekede el namysyn Ekaterına Aıdova, Inessa Shýmekova jáne Alına Daýranova qorǵaǵan bolatyn.
Tenıs: Qazaqstannyń birinshi, álemniń 27-raketkasy Aleksandr Býblık Monpelede (Fransıa) ótken ATP 250 týrnıriniń jeńimpazy atandy. Ol fınalda álemdik reıtıńte 37-orynda turǵan horvatıalyq Borna Chorıchpen sheberlik baıqasyp, úsh setke jalǵasqan machta 5:7, 6:3, 6:3 esebimen qarsylasynan basym tústi.
Boks: Ispanıanyń La Nýsıa qalasynda uıymdastyrylǵan bokstan Boxam Elite-2024 týrnırinde Qazaqstan áıelder quramasy eki altyn medal jeńip aldy. Bas júlde úshin ótken básekede Jazıra Oraqbaeva (52 kg) men Lázzat Kúngeıbaeva (+81 kg) top jaryp, jarys jeńimpazy atandy. Al Áıgerim Satybaeva (48 kg), Nazym Qyzaıbaı (50 kg), Ánel Saqysh (54 kg), Aıda Ábikeeva (63 kg), Mádına Nurshaeva (70 kg), Gúlsaıa Erjan (75 kg) jáne Farıza Sholtaı (81 kg) kúmis júldege qol jetkizdi.
Semserlesý: Shveısarıanyń Bazel qalasynda ótken semserlesýden Álem kýboginde Qazaqstan quramasynyń sportshylary shpaga básekesinde kúmis júldeger atandy.
Nysana kózdeý: Nıkıta Chırúkın Kaırdegi Álem kýboginde kúmis júlde jeńip aldy. Ol 25 metrden tapanshamen jyldam nysana kózdeýde tek Ońtústik Koreıa sportshysy Son Jýn Hoǵa ese jiberdi. Nıkıtanyń enshisinde – 31, al jeńimpazda – 37 upaı. Qola júlde alǵan Florıan Peter (Germanıa) 27 ret dóp tıgizdi.