Saýd Arabıasy munaı baǵasynyń 100 dollar deńgeıindegi beıresmı baǵdarynan bas tartyp, "qara altyn" óndirisin kúrt arttyrýdy josparlap otyr.
Bul álemdik munaı naryǵy men Qazaqstanǵa da aýyr soqqy bolýy múmkin. Ne bolyp jatyr?
Oil & Gas Journal Financial Times-qa silteme jasaı otyryp, Saýd Arabıasy álemdik munaı baǵasyn tómendetý múmkindigin baıypty túrde qarastyryp jatqanyn jazady. Basqa OPEK+ músheleri sıaqty, patshalyq qazan aıynan bastap munaı óndirýdi qysqartý saıasatynan bas tartýdy josparlaǵan. Alaıda bul jospardy eki aıǵa keıinge qaldyrdy, nátıjesinde baǵa ýaqytsha 2021 jyldyń jeltoqsanynan beri eń tómengi deńgeıge — barreline 70 dollarǵa deıin tústi. Qazir Saýd bıligi munaı óndirisin qaıta arttyrýdy kózdep otyr, bul munaı baǵasyn qaıtadan tómendetýi múmkin, dep habarlaıdy aqshamnews.kz.
2022 jyly munaıdyń ortasha baǵasy barreline 99 dollardy quraǵan edi — bul segiz jyl ishindegi eń joǵarǵy kórsetkish bolatyn. Alaıda sodan beri "qara altyn" baǵasy barreline 73 dollarǵa deıin tómendedi, al OPEK elderiniń naryqtaǵy úlesi tarıhı mınımýmǵa deıin qysqardy — olardyń ornyn basqa elder, ásirese AQSH, basyp aldy.
Bul jaǵdaı Saýd Arabıasyn alańdatyp otyr. Patshalyq naryqtaǵy kóshbasshylyǵyn qaıtarý úshin, tipti ýaqytsha baǵany tómendetý arqyly, naryqty óz munaıymen "toltyrýdy" josparlap otyr.
PVM Oil Associates Ltd kompanıasynyń munaı sarapshysy Tamash Varganyń aıtýynsha, Saýd Arabıasynyń munaı óndirisin arttyrý týraly jospary týraly jańalyqtyń ózi-aq 26 qyrkúıekte álemdik munaı baǵasynyń tómendeýine jetkilikti boldy.