Jyl ótken saıyn Jer betinde kóneniń kózi sanalatyn muralar azaıyp barady.
Biri qarýly qaqtyǵys saldarynan joıylsa, endi birine klımattyń ózgerýi kádimgideı kesirin tıgizip jatyr, dep habarlaıdy Almaty-akshamy.kz 24.kz-ke silteme jasap.
Ahýalǵa baılanysty IýNESKO uıymy dabyl qaǵyp, ǵasyrlar boıy saqtalyp kelgen tarıhı qazynany meılinshe qorǵap qalýǵa shaqyrýda. Sýdanda ıntellektýaldy mura joıylyp jatyr. El ishindegi turaqsyzdyqtan Hartým qalasynda eń iri kitaphana órtenip ketti.
Ulttyq mýzeı de shabýylǵa ushyrap, biraz jádiger joıyldy. Qolda bar málimet boıynsha, elde qarýly qaqtyǵys bastalǵaly 30-ǵa jýyq mádenı hám arheologıalyq eskertkish qıraǵan. 4 mýzeı búlingen. Mamandar olardyń bárinde ejelgi órkenıetke tán buıymdar saqtalǵanyn aıtady. Sonymen qatar, IýNESKO-nyń muralar tizimine engen 2 nysan aýmaǵynda tonaý áreketteri jıilep ketken. Soǵan qaramastan, mamandar qundy jádigerlerdi barynsha qorǵaýǵa tyrysyp jatyr. Qytaıda býdda beınelengen freskalarǵa joıylý qaýpi tóndi. Atap aıtqanda, úńgir ishindegi ǵıbadathanada ylǵaldylyq artyp, qabyrǵadaǵy sýretter búline bastaǵan. Bunyń bári klımattyń ózgerýiniń kesiri deıdi mamandar. Olardyń aıtýynsha, keıingi 20 jylda Gansý provınsıasyndaǵy aýa temperatýrasy álemdegi ortasha kórsetkishten birshama joǵarylaı túsken. Jańbyr da jıilep ketipti. Sonyń saldarynan keıbir jádiger aınaldyrǵan 1-2 jyldyń ishinde tolyǵymen joıylýy múmkin. Shahar sýǵa shógip barady
«Venesıany Dúnıejúzilik mura tizimine qosý kerek». IýNESKO mamandary jýyrda osyndaı málimdeme jasady. Usynys kelesi aıda uıym otyrysynda qaralady. Óıtkeni sý ústindegi qala kóp uzamaı qurdymǵa ketedi degen qaýip bar. Buǵan eń aldymen klımattyń ózgerýi áser etip jatsa kerek. Týrıserdiń tym kóp kelýi de qalaǵa óz zıanyn tıgizip jatyr, deıdi uıym ókilderi. Aıta keteıin, atalǵan málimdemede Italıa bıliginiń murany saqtap qalý úshin aýqymdy shara jasamaı otyrǵany da aıtylady.