Ótken jeksenbide Túrkıada jol apaty bolyp, zardap shekken qazaqstandyqtardyń biri aýrýhanada kóz jumǵany habarlanǵan edi.
Qaıǵyly oqıǵa saldarynan Mańǵystaý oblysynyń turǵyny qaıtys bolǵany belgili boldy, dep habalarlaıdy Almaty-akshamy.kz.
Lada basylymynyń jazýynsha, 49 jastaǵy mańǵystaýlyq zańger Kenje Muńaıtpasuly Túrkıanyń Alanıa qalasynda bolǵan jol apaty saldarynan kóz jumdy. Mańǵystaý oblystyq advokattar alqasy prezıdıýmynyń tóraǵasy Baýyrjan Musaev marqumdy eske alyp, jaqyndaryna kóńil aıtty.
Kenje Muńaıtpasuly 2018 jyldan bastap advokattyq qyzmetpen aınalysqan. Ol 2002-2013 jyldar aralyǵynda prokýratýra organdarynda jumys istegen.
«Kenje Muńaıtpasulynyń qaıtys bolǵany týraly habar bizdi qatty qaıǵyrtty. Osy qıyn sátte ókinishimizdi jetkizý úshin kóńil aıtý jetkiliksiz. Ol adal zańger, erekshe kásibı maman bolǵan. Onyń ómirden ótýi – bizdiń qoǵam úshin orny tolmas qaıǵy. Onyń talanty men jankeshtiligi eshqashan umytylmaıdy. Kenje Muńaıtpasulynyń otbasyna dostary men týystarynyń qoldaýy qaıǵyny eńserýge kómektesedi degen oıdamyn», - dedi Baýyrjan Musaev.
Eske salaıyq, QR Syrtqy ister mınıstrligi 30 shilde kúni tańerteń Alanıada shaǵyn avtobýs jol apatyna ushyraǵanyn, onyń ishinde Qazaqstannyń 12 azamaty bolǵanyn habarlaǵan edi.