14-15 qyrkúıekte elordadaǵy Táýelsizdik saraıynda ótetin Álemdik jáne dástúrli dinder lıderleriniń VII Sezine daıyndyq kezeńi tolyǵymen aıaqtalyp, baǵdarlamasy men baıandamashylardyń quramy jasaqtaldy, dep habarlaıdy Almaty-akshamy.kz Inform.kz-ke silteme jasap.
Sıeziń negizgi taqyryby: «Pandemıadan keıingi kezeńde adamzattyń rýhanı jáne áleýmettik damýyndaǵy álemdik jáne dástúrli dinder lıderleriniń róli».
Sezge Qazaqstan Respýblıkasynyń Prezıdenti Qasym-Jomart Toqaev qatysady. Jańartylǵan málimetterge sáıkes, is-sharaǵa álemniń 60 elinen 100-den astam delegasıa qatysady.
Jalpy Sıez mańyzdy qatysýshylar quramyn jınaıdy. Olardyń qatarynda Rım Papasy Fransısk, ál-Azhardyń Joǵarǵy ımamy sheıh Ahmad at-Taıeb, Izraıldiń Bas Ashkenazı ravvıni Davıd Laý, Izraıldiń Bas Sefarsd ravvıni Ishak Iosef, Ierýsalım pravoslavıe shirkeýiniń patrıarhy Feovıl III jáne basqa da dinı kóshbasshylar bar.
«VII Sez aıasynda ıslam, hrıstıan dini (barlyq úsh baǵyt – pravoslavıe, katolısızm, protestantızm), býddızm, ıýdaızm, ındýızm, daosızm, zoroastrızm, sıntoızm rýhanı kóshbasshylarynyń qatysýy kútilýde. Osy jyly Sıez jumysyna alǵash ret Úndistannyń ejelgi dini, djaınızm ókilderi qatysady.
Shara barysynda konfesıalardy bildiretin dinı kóshbasshylar, sonyń ishinde buryn qarym-qatynastyń kúrdeli tarıhy barlar bir ústelge jınalady. Osylaısha, dinı lıderler izgi nıettiń, kez kelgen aıyrmashylyqty eńserýge daıyn bolýdyń úlgisin kórsetedi. Bul sıeziń basty mısıasy», - dedi Álemdik jáne dástúrli dinder lıderleriniń VII Seziniń resmı ókili Nazym Janǵazınova.
Nazym Janǵazınova aıtqandaı, BUU basshylary, sondaı-aq bedeldi halyqaralyq uıymdar basshylarynyń Sıeziń jumysyna qatysýdyń mańyzy zor. Máselen, Sıez delegattarynyń arasynda BUU Bas hatshysy Antonıý Gýterrısh, Islam yntymaqtastyǵy uıymynyń (IYU) Bas hatshysy Hýseın Ibrahım Taha, Islam bilim berý, ǵylymı jáne mádenı uıymynyń (ISESKO) bas dırektory Salım bın Muhammed ál-Málik, Parlamentaralyq odaq tóraǵasy Dýarte Pasheký, BUU Bas hatshysynyń Órkenıet alánsy jónindegi Joǵarǵy ókili Mıgel Moratınos jáne t.b. bar.