«Jibek jolynyń injý-marjany» XIV Tashkent halyqaralyq kınofestıvali aıasynda ótetin Qazaqstan kınosy kúnderi 2022 jylǵy jańa «Paralımpıadashy» kórkem fılmimen ashylady, dep habarlaıdy Almaty-akshamy.kz Inform.kz-ke silteme jasap.
Kınofestıval uıymdastyrýshylarynyń aıtýynsha, kınokartına 13 qyrkúıek kúni Tashkenttegi Mýkımı atyndaǵy mýzykalyq drama jáne komedıa teatrynda kórermenge jol tartady.
Rejıser Aldıar Baıraqymovtyń «Paralımpıadashy» fılminiń sújeti Olımpıada oıyndarynyń altynyn armandap, jol apatyna túsip, aıaǵynan aırylǵan shańǵyshy Maqsat týraly baıandaıdy. Uzaq ýaqyt kúızeliske túsken Maqsat sportqa qaıta oralýdy sheshedi.
Buǵan deıin Tashkenttegi Halyqaralyq kınofestıvaldiń qurmetti qonaqtary Takeshı Kıtano, Armand Assante, Býrak Ozchevıt, Sergeı Bezrýkov, Djonnı Depp (onlaın), Tımýr Bekmambetov jáne basqa da kóptegen álemdik kınolardyń maıtalmandary bolatyny habarlanǵan.
Tashkent kınofestıvali, sonymen qatar Azıa, Afrıka jáne Latyn Amerıkasy elderiniń halyqaralyq kınofestıvali retinde belgili, dástúrli túrde Ózbekstan astanasynda 1968 jyldan 1997 jylǵa deıin ótti. «Jibek jolynyń injý-marjany» kınofestıvali 2021 jyly Ózbekstan Respýblıkasynyń Prezıdenti Shavkat Mırzıeevtiń bastamasymen qaıta jandanyp, jyl saıyn ótkizilip keledi.