Qazaqstan 13-18 qyrkúıek aralyǵynda Almatydaǵy jańa ADD ústel tenısi ortalyǵynda ótetin ústel tenısinen bedeldi WTT Contender Almaty halyqaralyq týrnırin qabyldaıdy, dep habarlaıdy Almaty-akshamy.kz Almaty.tv-ge silteme jasap.
Oǵan álemniń 28 elinen 140 atlet qatysady. Qazaqstan alǵash ret júlde qory 75 myń USD quraıtyn Contender serıasynyń álemdik deńgeıdegi týrnırin qabyldaıtyn bolady.
"Qazaqstan Ústel tenısi federasıasy árdaıym Halyqaralyq federasıa qamqorlyǵymen bedeldi týrnırlerdi uıymdastyrý boıynsha uzaq merzimdi nıetteri týraly málimdegen bolatyn. Bul bizdiń elimizdegi ústel tenısi boıynsha alǵashqy halyqaralyq oqıǵa emes. 2017 jyly Nur-Sultan qalasynda álemniń eń myqty sportshylarynyń qatysýymen ITTF World Tour Grand Finals halyqaralyq týrnıri ótkizilgen bolatyn. Ótken jyly biz ITTF International Kazakhstan Open halyqaralyq týrnırin ótkizdik, onda bizdiń sportshylar ózderin jaqsy kórsetti. Bul týrnır qazaqstandyq sportshylarǵa óz aýmaǵynda bedeldi halyqaralyq týrnırge qatysýǵa biregeı múmkindik beredi. Biz Halyqaralyq federasıa kórsetken senimdi joǵary baǵalaımyz jáne bul týrnırdi jyl saıyn ótkizýdi josparlap otyrmyz",- dedi Ulttyq ústel tenısi federasıasynyń prezıdenti Danıar Ábilǵazın.
Týrnırge álemdik ústel tenısiniń ataqty juldyzdary, onyń ishinde Olımpıada oıyndarynyń birneshe dúrkin júldegeri jáne Álem kýbogynyń jeńimpazy Dmıtrıı Ovcharov (Germanıa), Olımpıada oıyndarynyń qola júldegeri Lın Iýnjý (Qytaıdyń Taıbeıi), Álem chempıonatynyń kúmis júldegeri Mattıas Falk (Shvesıa), Eýropa chempıony, Olımpıada oıyndarynyń qola júldegeri Dang Sú (Germanıa), Álem chempıonatynyń qola júldegeri An Dje-hón (Ońtústik Koreıa) jáne basqalar qatysady.
ITTF jáne WTT erejelerine sáıkes, atalǵan týrnırde Qazaqstannyń atynan 11 er sportshy jáne 11 áıel sportshy qatysatyn bolady, olardyń ishinde quramanyń kóshbasshysy, Rıo-2016, Tokıo-2020 Olımpıada oıyndarynyń qatysýshysy jáne kóptegen halyqaralyq týrnırdiń jeńimpazy Kırıll Gerasımenko, sondaı-aq halyqaralyq jarystardyń birneshe dúrkin júldegeri, jasóspirimder arasyndaǵy Azıa chempıonatynyń qola júldegeri Alan Qurmanǵalıev bar.
Týrnırdi tikeleı efırde "QAZSPORT" telearnasy men ITTF Halyqaralyq federasıasynyń resmı saıty kórsetedi.
Qazaqstannyń ústel tenısi Federasıasy týrnırdi uıymdastyrýǵa qoldaý kórsetkeni úshin QR Mádenıet jáne sport mınıstrligine, Ulttyq Olımpıada Komıtetine, Sportty damytý dıreksıasyna jáne Almaty qalasynyń ákimdigine alǵys bildiredi. Sondaı-aq bas demeýshi - Samuryq - Qazyna, "Týrızm jáne sport ındýstrıasyn qoldaý qory", "ADD Capital", "PTC Holding", "Qazaq Oil", "Qazaqmys korporasıasy", "Sulpak", "Halyk bank" demeýshilerine jáne týrnırdiń aqparattyq seriktesi - "QAZSPORT" telearnasyna alǵys bildiredi.