«Taza Qazaqstan» respýblıkalyq aksıasy aıasynda Almaty qalasy Túrksib aýdanynyń komúnıtı ortalyǵynda jastar jáne ekologıa salasynda belsendi azamattardyń qatysýymen «Álemdi birge saqtaıyq» atty dóńgelek ústel ótti, dep habarlaıdy almaty-akshamy.kz.
Sharanyń negizgi maqsaty – ekologıaǵa tıgizetin zıandy azaıtý, qorshaǵan ortany qorǵaý joldarynda belsendilik tanytý jáne jaýapkershilikti arttyrý. Dóńgelek ústel barysynda qatysýshylar ekologıany saqtaý baǵytynda qandaı naqty qadamdar jasalýy kerektigi týraly pikir almasty.
Talqylaý barysynda ekologıalyq quzyrettilikti damytý, tabıǵatty qorǵaý jáne qazirgi tańdaǵy ekologıalyq máselelerdi sheshý joldary qarastyryldy. Ásirese, óndiris oryndarynan shyǵatyn qoqystardy tıimdi basqarý jáne zıandy qaldyqtardy azaıtý máseleleri kóterildi. Jastardyń ekologıaǵa degen qyzyǵýshylyǵy men olardy sheshýge degen umtylysy erekshe nazar aýdartty.
«Jastar el bolashaǵy ekenin eskersek, olardyń qorshaǵan ortany qorǵaý máselesine shynaıy qyzyǵýshylyq tanytýy qýantady. Olar bul máselede tek sózben ǵana emes, naqty is-áreketterimen de úles qosyp júr. Bizdiń sharanyń maqsaty – osy belsendilikti arttyrý jáne olardy birlese jumys isteýge yntalandyrý», – dedi sharany uıymdastyrýshy Abdýalı Rasýl Jeńisuly.
Shara sońynda qatysýshylar tabıǵatty qorǵaý baǵytyndaǵy jumystaryn jalǵastyrýǵa jáne jumyla jumys isteýge ýaǵdalasty.