Apattyń aıtyp kelmeıtini qutqarýshylardyń qyzmetine zárýlikti arttyrdy, dep habarlaıdy almaty-akshamy.kz.
Kúnniń ysýy, tabıǵattaǵy ózgerister qaýipti kúsheıtti. Endi kóp jerde qutqarýshy jetispeı jatqan kórinedi.
24.kz habarlaýynsha, Qytaıdyń Hýnan provınsıasynda 2 aptadan beri tolassyz jańbyr jaýyp, sońy alapat tasqynǵa ulasty. Qutqarýshylar jetispeı, biraz jurt úıinen shyǵa almaı qalǵan. Tipti keı jerde sý deńgeıi 3 metrge jetken. Júzge jýyq ózen tasyǵan. Osy kezde serfıngpen aınalysatyn sportshy jigit kishkentaı rezeńke qaıyǵymen jerlesterin qutqarýǵa kiristi. 42 jastaǵy Iý Zýen az ýaqytta 50-den astam adamdy qamalǵan úıinen aman-esen alyp shyqqan. Ol zardap shekkenderdi qaıyqqa otyrǵyzyp, qutqardy.
Al AQSH-ta muhıt jaǵasynda shomylý qaýipti. Jan-jaǵyn 3 muhıt shaıyp jatqan AQSH-taǵy jaǵajaılarda jyl saıyn júzdegen adam jazataıym sýǵa ketedi. Bir ǵana Florıda shtatynda keshe ǵana 6 turǵyn opat boldy. Eldegi Qutqarý qaýymdastyǵy operasıanyń 80%-ten astamy muhıttyń jaǵaǵa uratyn tolqyndarymen baılanysty deıdi.
Denıel Barnıkel, qutqarýshy:
Muhıttan jaǵaǵa uratyn tolqyndarmen kúresý óte qıyn. Sýǵa kete bastaǵan adam túk isteı almaı qalady. Ony qutqarý da ońaıǵa soqpaıdy. Óıtkeni tolqyn óte asaý. Qutqarýshynyń erkin qımyldaýyna erik bermeıdi. Ókinishke qaraı, kóptegen adamdar muhıttaǵy shomylýǵa tyıym salynǵan mejeden asyp, jaǵadan alystap, asaý tolqyndarǵa tap bolady.
Gazadaǵy qutqarý qyzmeti tehnıkasynyń 40%-i talqandaldy Tótenshe jaǵdaıdyń túri kóp. Eń aýyry – soǵys. Qazir álemde qutqarý qyzmeti eń kerek el Gaza sektory bolyp tur. Izraıl áskeri qutqarý qyzmetine tıesili tehnıkanyń 40%-i talqandap tastaǵan. Mamandar 2 saǵatta bitýge tıis qutqarý operasıasynyń keminde 6 saǵatqa sozylatynyn aıtady. «Reıter» agenttiginiń habarlaýynsha, qazir Gaza sektorynyń soltústiginde bir ǵana qutqarý mekemesi men bir ǵana órt sóndirý bólimi jumys isteıdi.
Mohammed Ál-Mýgeır, qutqarý qyzmetiniń basshysy:
Biz halyqaralyq zańnama boıynsha gýmanıtarlyq baǵytta jumys isteıtin mamandarmyz. Biz qarý asynǵan ásker emespiz. Bizdiń mısıamyz – adamdardy qutqarý, ómirine arasha túsý. Biraq Izraıl áskeriniń áreketi barlyq múmkindigimizdi joq qyldy, adymymyzdy ashtyrmaı qoıdy. Bul jaǵdaıǵa halyqaralyq qaýymdastyq batyl aralasýy kerek!
Qutqarýshylar – tabıǵı apat, tosyn oqıǵa, tipti qarýly qaqtyǵys kezinde beıbit turǵyndar úshin basyn báıgege tigetin adamdar. Olar – adam ómirin saqtaýshy.
Al Qazaqstanda qutqarýshylarǵa qandaı júk artylǵan? Tótenshe jaǵdaı mınıstrliginde qutqarýshylardyń túri san alýan. Onyń qatarynda ushqyshtar da, súńgýirler men álpınıser, órt sóndirýshiler jáne sonyń quramyndaǵy medısına, boljaý, baqylaý qyzmetkerleri de bar.
Jomart Asqarov, QR TJM Tótenshe jaǵdaılardy joıý departamenti bastyǵynyń orynbasary:
Qazirgi tańda táýlik boıy 3,5 myńnan astam adam, myńǵa jýyq tehnıka táýlik boıy qyzmette qazir tur. Astana, Almaty qalalarynda árıne, kóp. Shomylý maýsymy bastalǵalǵannan beri jáne onyń aldynda da kúnniń oraıyna baılanysty bizde 153 jyljymaly beket, 42 stasıonarly beketter ornatylǵan. Ol qosymsha ashylǵan.
Tótenshe jaǵdaı mınıstrligimen qosa, jedel qutqarý jumystaryn ishki ister organdary, atap aıtsaq, patrúldik polısıa men Ulttyq ulan áskerı qyzmetshileri de atqarady. Mysaly ishki ister organdarynan qoǵamdyq tártipti qamtamasyz etýge kúndelikti 14 myńnan astam adam jumyldyrylady.
Aıdyn Orazbaev, QR İİM Ákimshilik polısıa komıteti basqarma bastyǵynyń orynbasary:
Bıyl shomylý maýsymy bastalǵannan bastap ishki ister organdarymen 14 adam qutqaryldy jáne de 2 myńnan astam reıdtik shara júrgizildi. Sondaı-aq qalalyq, oblys ortalyqtaryndaǵy ruqsat etilgen shomylý jerleri bolatyn bolsa, olardyń barlyǵyna beınekameralar ornatylyp, sol beınekameralarmen de baqylaý jumystary júrgiziledi.
Árbir jasaqtyń bekitilgen patrúldik baǵyty bar. Sol baǵyt boıynsha barlaý jumystary kezinde oqys oqıǵa oryn alsa, jedel túrde osy jol polısıasy nemese Ulttyq ulan áskerleri tıisti kómek kórsetýge mindetti.
Elimizde oryn alǵan tabıǵı nemese tehnogendi tótenshe jaǵdaılar boıynsha bıylǵy jylǵy alty aıda 112 nómirine 2 688 520 qońyraý kelip tústi. Al tótenshe jaǵdaı mınıstrligi bólimsheleri oqys oqıǵa ornyna 41402 ret shyqty. Qyzmetkerler jalpy sany 61494 adamdy evakýasıalap, 9850-in qutqardy. Al zardap shekkender sany 2985-ke jetip, olarǵa medısınalyq kómek kórsetildi.