Aýyl sharýashylyǵy mınıstri Aıdarbek Saparov qytaılyq CITIC Construction jáne Beijing Capital Agro kompanıalarynyń basshylyǵymen kezdesti, dep habarlaıdy almaty-akshamy.kz.
Sondaı-aq kezdesýge qazaqstandyq «Meat processing and Servis company», «Elimaı Kókpekti», «Astana Agro Prodýkt» JSHS, Agro Silk Way, «Jake» SHQ, «Qazaqstan et odaǵy» qaýymdastyǵynyń ókilderi qatysty.
Qytaı aýyl sharýashylyǵy salasyndaǵy bizdiń iri saýda seriktesterimizdiń úshtigine kiredi. 2023 jyly QR men QHR arasyndaǵy AÓK ónimderiniń taýar aınalymy 1,3 mlrd AQSH dollary boldy. Bul – 2022 jylmen salystyrǵanda 67% -ǵa artyq. QHR-ǵa aýyl sharýashylyǵy ónimderin eksporttaý kólemi 2 ese ósip, 1 mlrd AQSH dollaryna jetti. Qytaıǵa eksporttyń negizgi kólemi dándi jáne maıly daqyldarǵa, túrli maılarǵa tıesili, biraq biz mal sharýashylyǵy ónimderi esebinen eksport kólemin ulǵaıtý úshin úlken áleýetti kórip otyrmyz, – dedi Aıdarbek Saparov.
Sonymen birge vedomstvo basshysy 2024 jyldyń aqpanynda QHR Úkimeti Qazaqstannyń ońtústik-shyǵys óńirlerinen et ónimderin eksporttaý boıynsha shekteýlerdi alyp tastaǵanyn eske saldy.
Bul joǵary sapaly azyq-túlik ónimderiniń eksportyn jańǵyrtýǵa múmkindik berdi. Sıyr etiniń birinshi partıasy maýsymda QHR-ǵa eksporttaldy. Búgin 75 mln AQSH dollary somasyna úsh jańa shartqa qol qoıylady. QHR tóraǵasy Sı Szınpınniń Qazaqstanǵa memlekettik sapary aıasynda bizdiń mınıstrlik pen QHR GTQ arasynda iri qara maldy eksporttaýǵa arnalǵan veterınarlyq talaptardy kelisý jónindegi hattamaǵa qol qoıyldy. Eksporttalatyn ónim nomenklatýrasyn ulǵaıtý boıynsha jumys júrgizilip jatyr. AÓK ónimderiniń taǵy 10 túri ázirlenedi. Biz AÓK salasyndaǵy birlesken ınvestısıalyq jobalardy iske asyrýǵa jáne yntymaqtastyqqa ashyqpyz. Onyń ústine bul baǵytta oń tájirıbe bar: maıly daqyldardy qaıta óńdeý, qurǵaq sút óndiretin kásiporyndar jumys isteıdi. Bıdaıdy, júgerini tereń qaıta óńdeý zaýyttaryn, mal sharýashylyǵy keshenin salý josparlanǵan, – dep tolyqtyrdy Aıdarbek Saparov.
Qytaılyq kompanıalardyń ókilderi Qazaqstanmen sıyr eti men tiri mal satyp alý turǵysynan uzaq merzimdi yntymaqtastyqqa qyzyǵýshylyq tanytty. Máselen, Beijing Capital Agro kompanıasy 2030 jylǵa deıin etti mal sharýashylyǵy salasyna 600 mln dollardan astam ınvestısıa salýǵa nıetti. Joba aıasynda bordaqylaý alańdary qurylyp, 600-den astam fermerlik sharýashylyq pen jumys istep turǵan bordaqylaý alańdary iskerlik áriptestikke tartylady. 3500-den astam jumys orny qurylady dep kútiledi.
Jıyn sońynda «Meat processing and Servis company», Agro Silk Way, «Astana Agro Prodýkt» JSHS QHR kompanıalarymen et eksportyna, sondaı-aq tiri mal jetkizýge úsh kelisimshartqa qol qoıdy.