Álemdegi eń bedeldi tólqujat – BAÁ azamattarynda.
Olar úshin 125 elde vızasyz rejım qoldanylady, taǵy 55 elde vızany kelgennen keıin alýǵa bolady jáne tek 18 elge vıza qajet. Tólqujattarǵa qatysty reıtıńti Finprom.kz jarıalady, dep habarlaıdy Almaty-akshamy.kz.
Al elimizdiń pasporty reıtıńte 97 el arasynda 53-shi orynǵa turaqtady.
Reıtıńige BUU-ǵa múshe 193 el jáne 6 aýmaq qatysty (birneshe el bir oryndy ıelenýi múmkin).
Qazaqstan Respýblıkasynyń ındeksi 91-di qurady (ındeks neǵurlym joǵary bolsa, el pasporty soǵurlym bedeldi bolyp sanalady). Qazaqstandyq pasporty bar azamattar vızasyz 39 elge bara alady, taǵy 52 elde vızany kelgennen keıin rásimdeýge múmkindik jasalǵan. Al 107 memleketke barý úshin qazaqstandyqtarǵa vıza qajet. Aıta keteıik, Qazaqstan bul oryndy Tynyq muhıtynyń marjan aralyndaǵy asa kishkentaı memleket Naýrýmen bólisip tur.
Ár pasporttyń jeke razrádyn anyqtaý úshin reıtıń sarapshylary úsh deńgeıli ádisti qoldanǵan:
- Mobıldilikti baǵalaý (MS) – vızasyz rejım (VF), kelý vızasy (VOA), kirýge elektrondy ruqsat alý (eTA) jáne vızany elektrondy (eVisa) túrde alý, eger 3 kún ishinde berilse;
- VF jáne VOA upaılary;
- BUU Damý baǵdarlamasynyń adam áleýetin damytý ındeksi (qosymsha krıterıı retinde paıdalanylady).
Reıtıńiniń ortasynda – 45-shi orynda, 101 ındeksi bar tólqujattar Shyǵys Tımor men Bahreın ornalasqan.
TMD elderi arasynda Qazaqstan pasporty Ýkraına, Reseı, Moldova jáne Belarýs elderine jol berip tur. Bul rette, bizdiń pasport Armenıa, Ázerbaıjan, Qyrǵyzstan, Ózbekstan, Tájikstan jáne Túrikmenstan qujattarynan myqty bolyp otyr.