16 jeltoqsan – elimizdiń egemendigi jarıalanǵan kún. Sol kúni kógimizde Táýelsizdik týy jelbiredi. Sodan beri 30 jyl ýaqyt ótti. Osy óshpes jyldar belesinde elimizdiń ekonomıkasy qaryshtap damydy. Saıasattaǵy syndarly baǵyt óz jemisin berýde. Bereke-birliktiń arqasynda álem tanyǵan irgeli memleketke aınaldyq.
Artqa tastaǵan otyz jyldyń ishinde ne atqardyq degen saýal týsa, tizbektep sózben jetkizý múmkin emes. Bir memleketke jeterlik is tyndyrylyp, júzege asyrylýda. Ekonomıkalyq jaǵdaıymyz jaqsaryp, ál-aýqatymyz artty. Qazaq mektepteri men balabaqshalar sany kóbeıip, bilim men densaýlyq jaǵdaıyna asa mán berildi. Ózge eldermen qarym-qatynasymyz jaqsaryp, saıası jáne mádenı qatynastar da údeı tústi. Elimizdiń barlyq salasyndaǵy qyzmetkerlerge shet eldiń túrli saladaǵy mamandarymen tájirıbe almasýǵa jaǵdaı jasaldy. Osynyń bári táýelsiz eldiń maqtanyshy deýge bolady.
Táýelsizdik uǵymy ár halyq úshin qasterli. Táýelsizdikpen birge Qazaqstan memleketiniń jańa dáýiri bastaldy. Erkindik elimizdiń ulttyq qundylyqtaryna bet burýǵa jáne ony qaıta jańǵyrtýǵa jol ashty. Ulttyq dúnıetanymǵa degen erkin kózqaras paıda boldy.
Táýelsizdik tilimiz ben dinimizdi qalypqa keltirdi. Ulttyq sana-sezim qalyptasty. Ata-babalarymyzdyń ańsaǵan armandary oryndaldy. Oǵan qol jetkizý qanshalyqty qıyn bolsa, sol egemendikti saqtap qalý ońaı emestigi belgili. Táýelsizdiktiń árbir qazaqqa bergeni mol.
Táýelsizdikke jetý joly qanshalyqty aýyr bolsa, Táýelsizdikpen tynystaýdyń baıandylyǵy da sonshalyqty jaýapty ekeni anyq.
Egemen elimizdiń qalyptasý jyldarynda bilim salasynda da edáýir jańalyqtar boldy. Jańadan bilim berý nysandary salyndy. Mektepter men balabaqshalar kóbeıdi. Ásirese, qazaq mektepteriniń sany artty. Munyń barlyǵy Táýelsizdiktiń arqasy dep bilemin. Ózim qyzmet etetin Alataý aýdanyndaǵy №179 jalpy bilim beretin mektep ujymy bilim salasynyń damýyna, jas urpaqtyń sapaly bilim alýyna zor úlesin qosyp keledi. Ujymymyzda tájirıbeli ustazdar kóp. Oqýshylarymyz qalalyq, respýblıkalyq saıystardan, túrli olımpıadalardan júldeli oryndar alyp júr. Osynyń bári qýanysh, jetistik.
Elimizdiń Táýelsizdikke ońaıshylyqpen qol jetkizbegeni týraly memleketimizdiń bolashaǵy sanalatyn mektep oqýshylaryna únemi aıtyp otyrǵan jón. Osy oraıda mektepterde bolatyn Táýelsizdikke baılanysty tárbıelik is-sharalar tek jeltoqsan aıynda ǵana emes, basqa ýaqyttarda da ótip turýy qajet dep esepteımin. Menińshe, erjúrektiligin pash etken tulǵalardyń beınesin jasap, olardyń uly isterin tárbıelik baǵyttarda qashanda dáristerimizge qosyp otyrǵanymyz abzal.
Táýelsizdigimizdi kúlli álemge tanytyp otyrǵan qazaq eliniń keleshegi aıqyn, bolashaǵy jarqyn. Tek osy qundylyǵymyzdy qasterlep, saqtap, keleshek urpaqqa jetkizý – bizdiń mindetimiz.