Jyl basynan beri RF kólikteriniń júrgizýshileri jasaǵan 59 364 quqyq buzýshylyq tirkelgen
Almatyda jyl basynan beri RF nómiri bar kólik júrgizýshileri jasaǵan 60 myńǵa jýyq buzýshylyq tirkeldi, dep habarlaıdy Almaty-akshamy.kz Polisia.kz-ke silteme jasap.
Almaty qalalyq PD qalada jyl basynan beri RF kólikteriniń júrgizýshileri jasaǵan 59 364 quqyq buzýshylyq tirkelgenin habarlady. Aıyppul 21,3 mıllıon teńgeden astam somany qurady.
«Aıta ketý kerek, jol qozǵalysyna qatysýshylardyń osy sanatyndaǵy kólik júrgizý tártibi nashar. Shet memleketterdiń nómirleri “Jol qozǵalysy qaýipsizdigi” jáne “Sergek” avtomattandyrylǵan aqparattyq júıeleri arqyly tanylmaıdy dep jańylysyp, olardyń júrgizýshileri barlyq jerde jol qozǵalysy erejelerin buzady: jyldamdyqty shekten tys asyrady, baǵdarshamnyń tyıym salynǵan belgisine qaramaı, qıylystardy kesip ótedi, qarsy kele jatqan jolaqqa ótedi, jol belgileri men tańbalaý talaptaryn saqtamaıdy jáne t.b. Mundaı mádenıetsizdik kóbinese apattar men qaıǵyly zardaptarǵa ákeledi. Túrli qýlyqqa barý arqyly jaýapkershilikten jaltarý áreketteri sátti aıaqtalmaıtynyn jáne nátıjesiz bolatynyn resmı túrde málimdeımiz. Zań – bárine birdeı. Jol qozǵalysy erejeleri qatań saqtalýy tıis», – dedi Almaty qalalyq PD bastyǵynyń birinshi orynbasary Nurlan Almasbekov.
Almaty joldarynda shetelde tirkelgen kólikterdiń qatysýymen 50-den astam aýyr jol apaty oryn alǵan. Saldarynan bir adam qaza taýyp, taǵy 59 adam jaraqat aldy.
«Esterińizge sala keteıin, Naýryzbaı aýdanynda adam ólimine ákep soqqan jol-kólik oqıǵasy boldy. RF tirkelgen VAZ avtokóliginiń júrgizýshisi, 2001 jyly týǵan O.esimdi azamat Karernaıa kóshesimen soltústik baǵytta kele jatyp, qarama-qarsy baǵyttaǵy jolaqqa shyǵyp, KamAZ kóligimen soqtyǵysty. Osy oqıǵa saldarynan VAZ júrgizýshisi oqıǵa ornynda qaza tapty. Bostandyq aýdanynda aýyr zardaptarǵa ákelgen taǵy bir jol-kólik oqıǵasy oryn aldy. Nómiri Reseıde tirkelgen Infiniti júrgizýshisi Ál-Farabı dańǵylymen kele jatyp, róldi basqara almaı qaldy jáne bógetke soqtyǵysty. Osy jol-kólik oqıǵasy saldarynan jas jolaýshy-áıel aýyr jaraqat aldy. Júrgizýshi qylmystyq jaýapkershilikke tartyldy», – dep túıindedi Almasbekov.