Búgin Senattyń jalpy otyrysynda osy máselege oraı depýtattar Premer-mınıstrge saýal joldady.

Senator Lázzat Súleımen atap ótkendeı, bul depýtattyq saýaldy daıyndaýǵa janjal sońy adam ólimine ákep soqqan Almaty qalasyndaǵy turǵyn úıdi bosatýdy talap etý barysyndaǵy qaıǵyly oqıǵa sebep bolǵan.

Onyń sózinshe, júrgizilgen taldaý, kepildik múlikpen saýda-sattyq sybaılas jemqorlyq kórinisteri úshin jaıly orta bolyp otyr.

Bul bankter men jeke sot oryndaýshylaryna boryshkerlerdiń jyljymaıtyn múlkin tómen baǵamen, keıde shekteýsiz mólsherde satyp alýǵa múmkindik beredi. Bir adam birneshe páterdi satyp alǵan faktiler de tirkelgen. Sonymen qatar, barlyq saýda-sattyqqa qatysýshylar bir-birimen baılanysty bolǵan faktiler de az bolmaǵan, - dedi Lázzat Súleımen.

Depýtat ataǵandaı, 2021 jyldyń 1 shildesinen 30 qyrkúıegine deıin respýblıkanyń ákimshilik sottaryna 7 myńnan astam is qozǵalyp, onyń ishinde jeke sot oryndaýshylarynyń áreketterine shaǵymdaný boıynsha 2 338 talap aryz túsken.

Azamattardyń shaǵymdary negizinen jeke sot oryndaýshylarynyń qoldanystaǵy zańnama normalaryna, boryshkerdiń múlkine tyıym salý kezinde atqarýshylyq is júrgizý taraptarynyń quqyqtaryn buzýyna, sondaı-aq jeke sot oryndaýshylary qyzmetinde transparenttiliktiń bolmaýyna jáne osy saladaǵy tıisti memlekettik baqylaýǵa baılanysty, - deıdi ol.

Osyǵan baılanysty depýtattar kredıtorlar men boryshkerlerdiń múddelerin qorǵaý úshin senatorlar zańnamany jetildirý jóninde shara qabyldaýdy usyndy.

Azamattardyń jalǵyz turǵyn úıin óndirip alýǵa tyıym salýdy belgileýdi, tıisti NQA-ǵa bankterdiń qaryz alýshylardyń kepilge salynǵan múlkin satý jónindegi saýda-sattyqqa qatysýyn boldyrmaıtyn normany engizýdi, qaryz alýshy óziniń qarjylyq jaǵdaıyn jaqsartqanǵa deıin sharttyń talaptaryn oryndamaǵan kezde banktik qaryz boıynsha merzimin keıinge qaldyrý múmkindigin qaraýdy, bankterdiń banktik qaryz shartynda kózdelmegen qaryz alýshynyń múlkin óndirip alýyna tyıym salýdy belgileýdi jáne jeke sot oryndaýshylarynyń qyzmetin memlekettik baqylaý, olardyń laýazymdyq ókilettikterin tıisinshe oryndamaǵany, kásibı deńgeıin arttyrǵany úshin jaýapkershiligin kúsheıtý, - dep atap ótti ol.

Bul saýaldy senatorlar Asqar Shákirov, Vladımır Volkov jáne Lázzat Súleımen Úkimet basshysyna joldady.