Atyraýdan álem elderin jaıaý aralaýǵa shyqqan aqsaqal Grýzıaǵa jetti.
Ulytaý oblysynyń týmasy Sársenbaı Qotyrashov Grýzıa Respýblıkasyna jetkenin İnstagram áleýmettik jelisinde bólisti, dep habarlaıdy Almaty-akshamy.kz QazAqparatqa silteme jasap.
«Keshe Gýdaýrıdegi qonaqúıge qondym. Munda qonaqúı, meıramhana kóp, azyq-túlik dúkenin kórmeısiń. Joly yldı, shuǵyl burylystar bar. Mine, men qazir taýdyń baýraıynda ketip bara jatyrmyn. Joldyń bir jaǵy – jar, bir jaǵy – yldı», -deıdi egde jastaǵy saıahatshy Sársenbaı Qotyrashov.
Gýdaýrı – Grýzıanyń astanasy – Tbılısıden 120 shaqyrym qashyqtyqtaǵy kent. Oǵan Tbılısıden kólikpen 2 saǵatta jetýge bolady.
Saıahattaý eshqashan kesh emes deıtin 73 jastaǵy aqsaqal 2 tamyzda Atyraýdan jolǵa shyqqan edi.
Egde jastaǵy saıahatshy jaıaý saparyn 2025 jyldyń tamyzynda aıaqtaýdy josparlaǵan. Eki jylǵa sozylatyn jaıaý sapary úsh kezeńge bólingen.
Birinshi kezeńinde Qazaqstan, Reseı, Grýzıa, Túrkıa elderine 100 kúnde jetý. Atalǵan elderge deıingi qashyqtyq 3 myńǵa jýyq shaqyrymdy quraıdy.
Al, ekinshi kezeńde Túrkıa, Fransıa, AQSH elderine 180 kúndik saıahatyn bastaıdy. Bul elderdi aralaý úshin 9 myń shaqyrymnan astam jol júredi.
Úshinshi kezeńdegi saparynda AQSH pen Qytaıǵa, Mońǵolıaǵa barady. Odan soń Reseı arqyly Qazaqstanǵa oralýdy kózdep otyr. AQSH-tan Qazaqstanǵa jetkenge deıingi 130 kúnde 4 myń shaqyrymnan asatyn joldy artqa tastaıdy.
«Meniń ustanymym – saıahattaý eshqashan kesh emes. Álem elderin jaıaý aralaǵan qazaq qarıasynyń atyn Gınnestiń rekordtar kitabyna tirkep, álemdik rekord ornatsam deımin. Eń bastysy, beıbitshilikti nasıhattap, jahan elderin yntymaqqa shaqyrǵym keledi», -degen edi Sársenbaı Qotyrashov.