Meksıkada ótken «Álem arýy» halyqaralyq baıqaýynda Qazaqstan atynan óner kórsetken Madına Almuhanovanyń qatysýymen Óńirlik komýnıkasıalar qyzmetiniń alańynda baspasóz konferensıasy ótti. Ol baıqaýǵa qatysý barysynda alǵan áserleri men tájirıbesi jaıly áńgimelep, óz oıymen bólisti.
«Osyndaı aýqymdy baıqaýda óz elińdi tanystyrý – men úshin zor qurmet pen jaýapkershilik. Qazaqstannyń mádenı baılyǵyn kórsetip, elimizdiń biregeıligin tanyta alǵanyma qýanyshtymyn», – dedi ol.
Qazaqstan atynan qatysqan arý baıqaýǵa álemniń 125 elinen qatysýshylar kelgenin jáne tyǵyz kesteniń mańyzdy synaq bolǵanyn aıtty.
«Alǵashqy tórt kúnde tirkeý men fotosessıalar ótti. Uıqyǵa ýaqyt óte az bólindi, kezegimizdi kútýge kóp ýaqyt jumsaldy. Keıin basty fınalǵa daıyndyq bastaldy», – dep bólisti Madına.
Ol ásirese ulttyq kostúmder men áshekeılerdi tanystyrý kezeńinen erekshe áser alǵanyn atap ótti. Qazaqstandyq ulttyq zergerlik buıymdar kóptegen qatysýshylardyń qyzyǵýshylyǵyn týdyrǵan.
«Men ózimmen birge shekelik pen shashbaý ákeldim. Bizdiń zergerlik buıymdarymyz sheteldik qatysýshylardyń nazaryn birden aýdardy. Olar bul áshekeılerdiń maǵynasy týraly surap, qyzyǵýshylyq tanytty. Sonymen qatar, men qazaqstandyq shokolad syılyqtaryn ala bardym, barlyǵy onyń dámine tánti boldy», – dedi ol.
Madına bul baıqaýǵa qatysý oǵan ózin-ózi damytýda jańa kókjıekter ashyp, qundy tájirıbe bergenin aıtty.
«Bul baıqaý meniń ózime degen senimimdi arttyrdy. Osyndaı deńgeıdegi konkýrsqa qatysqannan keıin ishteı bir kúsh paıda boldy. Endi men odan da úlken jetistikterge jetýge bolatynyn túsindim», – dedi ol.
«Qazaqstan arýy» baıqaýynyń PR-dırektory Gúlim Sovetqan «Álem arýy» konkýrsynyń sulýlyq salasyndaǵy bedeldi is-sharalardyń biri bolyp qala beretinin atap ótti. Alaıda, bıyl Qazaqstan men Ortalyq Azıa elderine jetkilikti nazar aýdarylmaǵandyqtan, elimizdiń ókilderi toptarǵa ene almady.
Uıymdastyrýshylar kez kelgen baıqaýda jeńister men jeńilister bolatynyn atap ótip, bolashaqta baıqaýdy jetildirý úshin usynystardy eskerýge daıyn ekendikterin bildirdi.