2024 jylǵy 22 qarashada Jambyl atyndaǵy Qazaq memlekettik fılarmonıasynda Qurmanǵazy atyndaǵy Qazaq ulttyq halyq aspaptar orkestriniń 90 jyldyq mereıtoıy aıasynda kúıshi, dırıjer, «Qazaqstannyń eńbek sińirgen qaıratkeri», Memlekettik «Daryn» jastar syılyǵynyń ıegeri, Temirbek Júrgenov atyndaǵy Qazaq ulttyq óner akademıasynyń rektory Arman Júdebaevtyń shyǵarmashylyq keshi ótti, dep habarlaıdy aqshamnews.kz
Keshtiń shymyldyǵy Muqan Tólebaevtyń «Birjan-Sara» operasynan úzindimen ashyldy. Bul týyndyny Qurmanǵazy atyndaǵy orkestr men Baqytjan Baıqadamov atyndaǵy Memlekettik hor kapelasy oryndap, kórermenderge keremet áser syılady.
Saltanatty sharada eldiń tanymal tulǵalary men óner janashyrlary qatysyp, Arman Júdebaevtyń ulttyq ónerdi damytýdaǵy eńbegin joǵary baǵalady. Qazaqstan Respýblıkasy Prezıdentiniń keńesshisi Málik Otarbaev Arman Júdebaevqa Memleket basshysynyń Qurmet gramotasyn tabystasa, Parlament depýtattary Máýlen Áshimbaev pen Erlan Qoshanovtyń quttyqtaý sózderi jetkizildi. Sonymen qatar, Aqtoty Raıymqulova, Erbol Myrzabosynov, Darhan Jazyqbaev syndy laýazymdy tulǵalar keshtiń erekshe mańyzdylyǵyn atap ótti.
Kesh barysynda ulttyq jáne álemdik klasıkalyq mýzykanyń úzdik týyndylary shyrqaldy. Qurmanǵazynyń «Saryarqa», Nurǵısa Tilendıevtiń «Mahambet poemasy», Mıhaıl Glınkanyń «Rýslan men Lúdmıla» operasynan Ývertúra, Petr Chaıkovskııdiń «Pláska», sondaı-aq Arman Júdebaevtyń avtorlyq kúıi «Jetisý» oryndaldy.
Arman Júdebaev dırıjer retinde óz sheberligin pash etip, kórermendermen erekshe baılanys ornatty. Onyń zal toly kórermenderdiń shapalaqtaryn rıtmge sáıkestendirýi keshke erekshe serpin berdi.
Keshtiń aıryqsha ereksheligi – mýzykalyq janrlardyń úılesimdiligi men oryndaýshylardyń kásibı sheberligi boldy. Konsertte Qazaqstannyń Halyq ártisi Ramazan Stamǵazıev, Memlekettik syılyq laýreaty Talǵat Kúzembaev, kúıshiler Nurken Ashırov syndy ónerpazdar óner kórsetti.
Keshtiń fınalynda Qurmanǵazynyń «Saryarqa» kúıi oryndalyp, kórermenderdiń erekshe yqylasyna bólendi.
Arman Júdebaevtyń shyǵarmashylyq keshi ulttyq mýzykanyń rýhyn asqaqtatqan, óner súıer qaýymdy rýhanı baıytqan aıtýly mádenı sharaǵa aınaldy.