Toqaev Almatyda jer silkinisin boljaý boıynsha tapsyrma berdi
Prezıdent olardy Qyrǵyzstannyń dabyl júıesimen biriktirýdi tapsyrdy, dep habarlaıdy Almaty-akshamy.kz
Bul týraly Memleket basshysy Almaty jurtshylyǵymen kezdesýinde aıtty.
«Almaty úshin jer silkinisin dál boljaý jáne olar týraly erte habarlaý óte mańyzdy. 2025 jylǵa deıin 28 seısmıkalyq stansıany ornatýdy aıaqtaýdy, keıin olardy Qyrǵyzstannyń habarlaý júıesimen ıntegrasıalaýdy tapsyramyn. Sonymen qatar, qalada tótenshe jaǵdaılar týraly daýystyq habarlamalardy jiberý múmkindigi bar biriktirilgen eskertý júıeleriniń jumysyn jolǵa qoıý kerek», - dedi Memleket basshysy.
Qasym-Jomart Toqaev ákimdikke beınebaqylaý júıeleri, jol qozǵalysy, qońyraý shalý belsendiligi jáne áleýmettik ınfraqurylym derekterin biriktiretin ahýaldyq ortalyq qyzmetin tolyqtaı iske qosý qajet ekenin atap ótti.
Qalanyń «sıfrlyq egizin» qurý ıdeıasy aqparattyq tehnologıalar salasyndaǵy zamanaýı trendterge jáne ozyq halyqaralyq tájirıbege sáıkes keledi.
«Qyrkúıektegi Joldaýymda ár qala úshin jer telimderiniń fýnksıonaldyq ınteraktıv kartasyn jáne ınjenerlik jeliler sqemalaryn jasaýdy tapsyrǵan bolatynmyn. Almatyda bul nusqaý «sıfrlyq egizdi» damytý jáne qalanyń bas josparyn jańartý aıasynda júzege asyrylyp jatyr. Bul jobalar bir-birimen ushtasyp jatqany júıeli kózqarastyń jaqsy úlgisi. Jalpy, bul meniń jaqyn bolashaqta qalany damytýdyń negizgi basymdyqtary týraly kózqarasym», - dedi Memleket basshysy.
Prezıdent búgin aıtylǵan barlyq tapsyrma men jobalar birinshi kezekte almatylyqtardyń ómir súrý sapasyn jaqsartýǵa, ekonomıkalyq áleýetti nyǵaıtýǵa jáne qalanyń tartymdylyǵyn arttyrýǵa baǵyttalǵanyn atap ótti.