Úkimet otyrysynda «Aýyl – El besigi» jobasynyń iske asyrylý barysy qaraldy
Bıyl 27 qazannan bastap QR Premer-Mınıstri Asqar Mamınniń tapsyrmasy boıynsha ortalyq memlekettik organdardyń basshylary aýyldyq eldi mekenderdegi ınfraqurylymdy jańǵyrtý barysyn baqylaý maqsatynda óńirlerge ınspeksıalyq saparlardy bastady, dep habarlaıdy Almaty-akshamy.kz
Qazaqstanda aýyl halqynyń 89%-y turatyn 3561 perspektıvaly aýyl (1173 tirek jáne 2388 seriktes) aıqyndaldy. 2019-2021 jyldary «Aýyl – El besigi» jobasy, sondaı-aq Jumyspen qamtý jol kartasy, «Nurly jol» jáne «Nurly jer» baǵdarlamalary boıynsha jáne jeke ınvestısıalar esebinen aýyldyq aýmaqtardy damytýǵa 1,2 trln teńge baǵyttaldy. TKSH, kólik, bilim berý, densaýlyq saqtaý, mádenıet jáne sport salalarynda 12 myńnan astam joba iske asyryldy, 6,5 myń joba iske asyrylý satysynda.
Aldaǵy tórt jylda «Aýyl – El besigi» jobasyn qarjylandyrý kólemi 800 mlrd teńgege deıin ulǵaıady, al barlyq qarjy kózderin eskere otyryp, aýyldardy jańǵyrtýǵa 1,3 trln teńge josparlanǵan. 2025 jylǵa qaraı aýyldyq jerler 100% sýmen jabdyqtaý qyzmetterimen qamtamasyz etiledi, 10 myń shaqyrym kentishilik joldardyń jaı-kúıi jaqsartylady, 12 myń shaqyrym ınjenerlik jeli, birneshe myń áleýmettik ınfraqurylym obektisi salynady jáne jóndeledi, 5 myń aýyl mektebi jańǵyrtylady.
AÓK salasynda 4,5 trln teńge somasyna 1 myńǵa jýyq joba iske asyrylady. Aýyl sharýashylyǵyndaǵy eńbek ónimdiligi 2,5 ese artady, qaıta óńdelgen ónim úlesin 70%-ǵa deıin jetkize otyryp, AÓK ónimderiniń eksporty 2 ese artady. 1 mln aýyl turǵynynyń tabysy artady, aýyl sharýashylyǵynda 500 myń jumys orny qurylady. Bıyl 29 qazanda QR Premer-Mınıstri Asqar Mamın Aqmola oblysyna jumys sapary barysynda «Aýyl – El besigi» jobasynyń iske asyrylýyn tekserdi.
«Memleket basshysy Qasym-Jomart Toqaev «Aýyl – El besigi» jobasyn iske asyrýǵa jáne aýyldyq eldi mekenderdegi turmys sapasyn arttyrýǵa kóp kóńil bóledi. Úkimet músheleri «Aýyl – El besigi» jobasynyń jáne aýyl aımaqtaryn damytýdyń basqa da baǵdarlamalarynyń oryndalýyn baqylaý boıynsha elimizdiń barlyq óńirine ınspeksıalyq saparlardy bastady. Aýyldyq jerlerde ınfraqurylymdy jańǵyrtý boıynsha jobalardy iske asyrý qarqyny erekshe baqylaýda», — dedi A. Mamın.