Sınoptıkter Qazaqstanda aldaǵy kúzde qandaı aýa raıy bolatynyn aıtty. Olardyń málimetinshe, keıbir óńirlerde kóp mólsherde jaýyn-shashyn, al keı jerlerde tipti úsik kútilýde.
Jyly jáne az jaýyn-shashyndy aýa raıy tek qyrkúıektiń alǵashqy onkúndiginde ǵana saqtalady, sodan keıin atmosferalyq fronttardyń jıi aýysýy respýblıkanyń kóp bóliginde turaqsyz aýa raıyna ákeledi.
Jaýyn-shashyn, ekpindi jel jáne aýa temperatýrasynyń jıi aýytqýy kútiledi, al soltústik aımaqtarda túnde -1...-7 gradýsqa deıin úsik bolýy múmkin.
Ońtústik aımaqtarda joǵary qysym aımaǵynyń áserinen jaýyn-shashyn mólsheri normadan tómen bolady, al temperatýralyq fon salystyrmaly túrde jyly bolyp qalady. Degenmen, aı ishinde temperatýra birtindep tómendeıdi: túnde +15...+23 gradýstan +3...+10 gradýsqa deıin, al kúndiz +25...+35 gradýstan +15...+23 gradýsqa deıin.
Qyrkúıek aıynda aılyq ortasha temperatýra respýblıka aýmaǵynyń kóp bóliginde normadan 1 gradýsqa joǵary, al batysta, shyǵys pen ońtústik-shyǵystyń taýly aımaqtarynda qalypty bolady dep kútilýde. Qyrkúıekte jaýyn-shashyn mólsheri respýblıka aýmaǵynyń kóp bóliginde normaǵa saı jáne odan kóp, al ońtústik aımaqtarda normadan az bolýy boljanýda.
«Qazan jáne qarasha aılarynda kúzden qysqa birtindep aýysý kútilýde. Jalpy alǵanda, Qazaqstannyń negizgi aýmaǵynda aýa temperatýrasy ótken jyldarmen salystyrǵanda tómen bolady, al jaýyn-shashyn mólsheri barlyq óńirlerde normaǵa saı jáne odan kóp mólsherde boljanýda. Tek respýblıkanyń ońtústik-batysy men ortalyǵynda jaýyn-shashyn mólsheri normadan az bolady», - dedi meteorologtar.