Almatyda ótken qoǵamdyq tyńdaýlarda atom elektr stansıasyn salýdyń ekologıalyq artyqshylyqtary talqylandy, dep habarlaıdy aqshamnews.kz
Atom energetıkasy salasyndaǵy jańa jobalar Qazaqstannyń ekologıalyq jáne ekonomıkalyq turaqtylyǵyn nyǵaıtý úshin mańyzdy qadam bolyp tabylady. Osyǵan oraı Almatyda Qoǵamdyq keńes pen Almaty Azamattyq alánsy birlestiginiń uıymdastyrýymen jarıa talqylaý ótti. Qoǵamdyq tyńdaýlar barysynda atom elektr stansıalarynyń ekologıalyq taza energıa kózi retindegi artyqshylyqtary erekshe atap ótildi.
Sarapshylardyń pikirinshe, atom elektr stansıalary jahandyq jylyný men klımattyń ózgerýine sebepshi bolatyn kómirqyshqyl gazy, metan jáne basqa da parnıktik gazdardyń shyǵarylýyn boldyrmaıdy. "Bul olardyń atmosferaǵa zıanyn azaıtý jáne dekarbonızasıaǵa qol jetkizý úshin kúreste mańyzdy qural", — dep atap ótti Gúlmıra Mýrsalova.
Qazaqstan Respýblıkasy Energetıka mınıstrligi Atom energetıkasy jáne ónerkásip departamenti dırektorynyń orynbasary Gúlmıra Mýrsalova ártúrli energıa kózderiniń ekologıaǵa áseri týraly statısıkalyq derekterdi usyndy. Onyń aıtýynsha, Qazaqstanda kómirqyshqyl gazy shyǵaryndylarynyń 80%-y energetıka sektoryna tıesili.
"Jasyl energıa stansıalaryn qurý arqyly biz kómirqyshqyl gazynyń shyǵaryndylaryn 70 mıllıon tonnaǵa deıin azaıta alamyz", - dedi ol.
Jasyl energıa kózderine kún, jel, sý elektr stansıalary, sondaı-aq atom elektr stansıalary kiredi. Sarapshy atom elektr stansıasynyń qurylysy aldaǵy referendýmnyń oń nátıjesi bolǵan jaǵdaıda ǵana júzege asyrylatynyn eske saldy.
Esterińizge sala keteıik, Qazaqstanda AES salý boıynsha jobalardy iske asyrý josparlanýda. Osyǵan baılanysty jaqyn arada referendým ótedi. Almatydaǵy jarıa tyńdaýlar Qazaqstanda ótkizilgen tyńdaýlardyń on toǵyzynshysy boldy.